大概逆轉及拼勁就係晏菲路球場嘅主題曲,一場更有起伏嘅翻版歐聯決賽。

英超講場 於 29/10/2019 發表 收藏文章
大概逆轉及拼勁就係晏菲路球場嘅主題曲,一場更有起伏嘅翻版歐聯決賽。
先講一開波就入球嘅熱刺,球隊趁利物浦第一次攻勢後未企穩陣腳,令中場軒達臣俾人迫甩個波然後施素高連過兩個成功地令個波落到孫大人腳下,最後勁射中柱彈岀由哈利仔補中。呢下不得不讚哈利嘅射門觸覺同佢嘅把握,球速咁快反彈向自己方向嘅時候都可以及時反應用個頭批個波去龍門所在嘅另一方向,令艾利臣只可以得個睇字望住個波過白界。當然入波之後嘅所餘時間,熱剌就係好明顯擺岀防反嘅姿態,只可惜成功造成嘅反擊威脅非常少,令球隊走向久守必失嘅命運。陣容上,非常慶幸見比普帥放棄三中堅,用翻玩開嘅四後衛,令球隊防守上唔再亂章失位,並且係加沙尼加門神上身下,成功維持0:1嘅優勢到半場。但係普帥就好似排翻啱個陣就算數,眼見球隊死守下,一次又一次都差啲失波竟然都無係半場嘅黃金時間做調整。最簡單,大力臣其實係防守上都算係弱項再加上佢近期狀態更可以話係差,早啲換走佢上尼當比利令球隊守轉攻更順唔係更好?加上既然都一心守,比利嘅防守一定比大力臣好得多,攔截能力提升下令對方踢得無咁順意。另外就係其他兩個調動實在太遲,摩拉竟然84分鐘先岀黎,計埋補時都唔知有無10分鐘點可以令佢入局發揮優勢?早啲換佢岀黎相信對利物浦後防黎講會造成幾大壓力,因為去到後期兩閘基本上上晒去,後面只有洛夫雲同雲大哥,孫大人加摩拉嘅反擊隨時可以令佢地食塵,但普帥調動上嘅速度仲係有待改善。
至於利物浦,首先不得不欣賞佢地嘅拼勁,對於第一球其實並無太大關於戰術上失誤,只係未站穩陣腳下衝動上前被過,令球隊先落後。球員上嘅精神真係可以話無可挑剔,就算攻勢點樣被門神上身嘅加沙尼加瓦解,佢地嘅眼神依然係咁有鬥志。唯獨今場,韋拿度姆有少少隱形,比較少蒲頭製造威脅及關鍵傳送,所以高普第一個選擇換走嘅正正係佢,亦都非常合理。但係高普嘅調動速度亦係佢仲未改善嘅地方,同普帥一樣非常慢,第一個調動竟然係77分鐘反超後,其後亦係差唔多接近最尾時刻先至用埋第三個調動,呢種過分謹慎嘅心態某程度上限制左調動制動之下嘅優勢,而今場兩位教練亦都犯下左同樣嘅錯誤,慢。除此之外,如我賽前分析所提及,進攻開始變得單調亦有繼續出現,過於倚賴兩閘上嚟斬波,明買明賣,唔算有充分用盡球場嘅闊度,猜個波入去再做致命一擊,但高普似乎未有意料到呢個問題,為日後對住其他泊大巴嘅球隊埋下失分嘅伏線,希望佢早日察覺提早改善,令利物浦今季可以稱霸英超。

如果喜歡我們的文章,請即分享到︰

標籤: 熱刺  利物浦  軒達臣  哈利  摩拉  加沙尼加  高普  晏菲路  歐聯  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→