兵工廠放棄幸運,心甘情願陪鶴臣合演快打快節奏

英超講場 於 31/10/2019 發表 收藏文章
講到今輪另一場嘅賽事,兵工廠主場對上水晶宮,原本工廠迷都應該以為球隊唔作客終於有機會係定位中遊嘅對手攞翻3分,加上早早十分鐘已經建立兩球嘅優勢,點知都係要失分喎,係咩地方岀事呢?
先睇阿仙奴嘅陣容,前鋒線上非常華麗,美羊半,pepe嘅速度可以話係驚人,亦都慶幸laca終於擺脫傷患可以正選。而快馬三人再配上擔任到派牌工作嘅借將Ceballos,中前場結構可觀。阿仙奴亦都順利係開波早段透過兩個角球,早係10分鐘已經建立兩球領先優勢,而呢兩球都只可以話係透個鴨仔波下含有幸福成份嘅入球,幫左阿仙奴大半隻手可以攞住3分走,點知呢兩球係救佢地攞翻1分嘅關鍵。皆因32分鐘,zaha單人成功係禁區製造犯規,chambers多腳攔截令到球隊輸咗球十二碼,比分拉近到2:1。同埋係下半場,雷斯走甩左ayew令球隊被追和,呢兩球其實反映咗阿仙奴後防個人能力不足嘅問題,chambers唔知到太心急定太驚zaha會硬爆自己落底,作出錯誤嘅判斷落錯腳踢跌左zaha,後防能力不足嘅問題其實早已係其他賽事暴露過,只係前鋒上有比較多嘅入球有時可以遮蓋到呢個問題,但若前方表現失準,欠運,球隊就只可以白白浪費分數,如果阿仙奴管理層決心今季可以係曼聯熱刺暫時低迷下搶分爭取好成績,我個人認為冬季轉會窗買人一定刻不容緩。
而另外一個問題就係主帥身上,早早領先兩球,反而仲會係半場後被帶風向,同人快打快。實在唔明白點解Emery見到呢個情況唔叫球隊好好掌控節奏,一早領先係上天送3分嘅大好機會,最佳做法當然慢慢踢,猜又好全體縮都好,等對方犯錯,制造反擊係發揮前線三人恐怖速度嘅絕佳機會,甚至可以令球隊多入一兩球。但球隊竟然唔係喺落後或者平手嘅狀態之下同人鬥快,你叫原本質素麻麻嘅後防點樣可以係急嘅情況下有好表現?係呢種情況下,走甩人情況就會發生,造成失球,所以Emery應付上一半嘅責任。
對阿仙奴黎講仲有一段小插曲,就係隊長Xhaka被換走嘅時候疑似發脾氣除衫。佢本人就有解釋話因為唔滿意自己表現所以先有呢個行為啦,但我個人就覺得身體嘅語言就好誠實。作為隊長,應該好好管理下自己嘅情商,行為應該成熟啲,加上自己表現若果唔好,就快手快腳落場為被迫和嘅球隊爭取時間啦,我諗呢次之後,若果佢係下場俾人褫奪隊長呢個名銜亦都唔岀奇,始終要佢擔大旗仲有成長嘅空間。
而岀奇地賽後仲排係頭6嘅水晶宮,都係排岀433,然後陣容係防守時徘徊喺451嘅意態,一向以穩陣行先亦係佢哋嘅招牌動作。比較欣賞呢邊主帥鶴臣,成功係落後之後帶阿仙奴打快,暴露對方防守問題,當然呢個都需要少少運氣,皆因都要兵工廠肯陪自己踢快啲先有奇效。另外球員上,再次欣賞到沙夏嘅突破能力及速度,期待佢喺未來有機會去到其他球會發光發熱。特別係一啲崇尚主攻嘅球隊,因為水晶宮呢類以防反為主嘅球隊,某程度上限制左佢係攻擊上發揮嘅機會,希望未來佢可以係其他大球隊大放異彩,亦相信佢已經吸引左唔少球會嘅注意,就即管留意吓呢位球員未來嘅發展。

如果喜歡我們的文章,請即分享到︰

標籤: 兵工廠  水晶宮  阿仙奴  pepe  Ceballos  zaha  chambers  雷斯  ayew  Emery  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→