當失意領隊遇上失意領隊 [愛華頓1:1熱刺]

英超講場 於 05/11/2019 發表 收藏文章
係為大家分析呢場比賽前,我在此衷心祝福係呢場比賽上面勇戰受傷嘅高美斯,作為運動員遇上如此重大嘅傷患唔多唔少都會影響到佢嘅未來,希望佢保持樂觀同埋積極嘅態度面對漫長嘅復康時間,球場永遠會留一個位置俾佢再次發光發亮。
主隊愛華頓今仗用上三個用波能力比較好嘅中場,delph, davies 同gomes試圖透過掌控中場從而限制熱刺,並係持球嘅時候減少被熱刺進攻嘅機會。全場防守主要以中低位壓迫,然後兩側落底去供應單箭頭嘅richarlison,或者就由佢自己單打獨鬥用個人能力製造射門,但大部分都難度過高,無甚威脅,當然因為佢俾對面sanchez經常特別招呼先至令到佢如此狼狽,亦都係單箭頭嘅弊處。係教練調動上,明白佢係落後下調入前鋒算係合理,再係80分鐘打多一個人嘅情況下換入攻擊屬性嘅前線球員都無錯,但換岀嘅人選就可能有更佳嘅選擇,Iwobi今場狀態麻麻,更係失球嘅半個罪人,佢會唔會係被換更好嘅選擇?當然,係gomes傷岀令藍軍上火外,補時12分鐘,熱刺心理上壓力,多打一個嘅種種有利情況下成功把握對方後防失誤追和。只可以話主帥馬高施華係帥位岌岌可危及落後的情況之下成功借絕地一搏攞翻一分,短期內再唔改善球隊嘅成績,特別係作客嘅表現,相信好快大家冇得係英超上面再見到佢係場邊。
至於熱刺,今場係哈利病左嘅情況下用上我成日提起嘅摩拉頂上,排上對熱刺黎講相對穩定嘅戰術 4231,前面孫仔同摩拉可以因應情況調轉企,一時企邊一時上前借箭頭,自由度較大,而前鋒線上擁有之前缺乏嘅速度。然而開波無耐,好快就發現普帥並無意識自己呢個陣容嘅優勢,熱刺並無因應人選上嘅改變而改變打法,有時仲會大腳上去揾人頂,無左簡利,前面根本無話邊個頂得,無辦法形成進攻套路,前面孫仔等人係無供應下只好被隱形。事實上,普帥嘅排兵及調動都有改善嘅地方。首先排兵,若以球隊近況,防守可以話係弱點,作客對住高幾班嘅愛華頓,可以考慮以守為先,用自己之前成日撞板嘅4312,既可以做好防守又能發揮今仗人選嘅優勢,速度。調動上,我明白重要賽事上,大力臣無可否認以佢嘅經驗,正常發揮下應有正選一席,但踢落佢嘅表現依舊未有起色。俾個小數據大家,根據統計,大力臣無一次成功過人,無一次創造機會,無射門,無攔截,失去控球權16次。若果以其他教練相信早早就已經換走佢,而唔係到90分鐘先換。再者,成功領先後,自然以守嘅時間多,防守又係佢弱項,又係咩原因令佢留係賽場呢?呢個問題真係可能只有普帥自己知。
最後,今場嘅VAR又係一個笑話,英超繼續以不影響賽事流暢度嘅原因下,命令主裁判唔洗去場邊睇電視,交俾VAR全權決定。但睇阿里個手球,兩個裁判係對講機互相溝通黎睇下就已經睇左三四分鐘,相信若主裁判自己睇都唔洗咁耐,又可以避免尺度不一。若果日後繼續係咁不作改善,其實唔用VAR好似仲好,好過帶一半嘅有色眼鏡去影響賽事真正嘅流暢度及尺寸劃一嘅標準。
標籤: 英超  熱刺  愛華頓  馬高施華  高美斯  VAR  艾歷臣  

留言


請按此登錄後留言。未成為會員? 立即註冊
    快捷鍵:←
    快捷鍵:→