連殺兩支Big 6球隊 白禮頓的天時地利人和

非Big6看英超 於 11/02/2021 發表 收藏文章
想知道更多英超英冠消息歡迎like同follow我地嘅page: https://www.facebook.com/leagueinengland

近期英超最令人驚喜嘅球隊應該非白禮頓莫屬啦,上星期連續兩場擊敗兩支Big 6球隊,近5場聯賽亦保持不敗,慢慢遠離降班區。究竟有甚麼天時地利人和因素,令到白禮頓可以踢出如此意外嘅成績?

天時
先逐一看看5場比賽入面嘅對手,首先係超攻型嘅列斯聯,這方面對防守較優勝嘅白禮頓嚟講極之有利。喺格食格嘅情況之下,白禮頓成功贏到2-0,係5場入面唯一入到兩球嘅一場。然後對住富咸,雖然攻唔入人地,但面對富咸疲弱嘅攻力,防線綽綽有餘。及後來到最艱難果2場,首先面對剛剛輸掉Big 6對決兼有哈利卡尼受傷嘅熱刺,明顯見到對手球員在這兩個因素之下,心理質素比較差,而在戰術上,沒有哈利卡尼嘅熱刺根本差咗幾班,結果白禮頓有機會爆冷。之後嘅對手利物浦處於低潮期,前線三人同兩閘都冇態,中場又推曬去踢中堅咁滯,加上啱啱俾般尼破咗keep咗幾年嘅六十幾場主場不敗紀錄,又入極都入唔到波,對住啱啱隊冧咗Big 6球隊士氣非常好嘅白禮頓,結果爆冷賽果再一次出現。之後對住近況回勇嘅般尼,亦都成功以1-1保持不敗。

可以講白禮頓面對住兩支Big 6球隊,都十分有運咁有天時優勢,喺人地最頹果陣對賽,喺足球比賽狀態、士氣同運氣效果比實力更大嘅情況下,就俾佢地接連創造出意外嘅賽果。

地利
喺現時冇球迷入場之下,主場定作客已經唔重要啦。話唔定正正就係因為咁,作客主場球迷非常熱情嘅利物浦時,對面失去第十二人嘅現場支持,亦冇咗同自己對着幹嘅聲音,反而令防守為主嘅白禮頓踢得更順,結果爆冷成功。

人和
白禮頓今季改踢3中堅陣式,變得以防守為先,不過除咗開季第2輪漂亮地3-0大勝紐卡素之外,其餘時間球員好似未適應到新陣式咁,加上季中又棄用原本的首席門將馬菲賴恩(),新提拔嘅羅拔山齊士()未咁快適應到,結果又要捲入護級漩渦。不過嚟到近排,中後場開始夾得到,後場嘅「345組合」—3號韋治(Ben White)、4號威士打(Adam Webster)和5號登克(Lewis Dunk)發揮出色,既有防守力,又可以用波。事實上白禮頓喺近5場嘅不敗比賽中,有3場保持清白之身,其中兩場就係對2支Big 6球隊,其餘兩場都只失一球,見到345組合同門將羅拔山齊士夾熟咗之後,後防穩定咗好多,尤其是兩場對Big 6嘅比賽入面,可以見到條防線比季初更加有板有眼,對住強隊(雖然冇態)都依然應付得到。
擁有穩定嘅防線除咗幫海鷗帶嚟今季第1次嘅5場不敗之外,亦都會係佢地今季護級甚至殺上中游嘅關鍵。回望過往嘅護級球隊入面好多都係防守力較強嘅球隊,最出名嘅例子就係大Sam以前教過嘅球隊,同樣好似而家嘅白禮頓咁,連殺幾支Big 6同前列球隊。所以照咁睇白禮頓唔單止自己嘅表現有進步趨勢,加上今季仲有榜尾三弱墊底,所以白禮頓今季應該可以輕輕鬆鬆護級成功。


雖然天時同地都可以算係運氣,自己控制唔到,但人和方面就可以見到白禮頓嘅努力啦。開季果陣筆者覺得白禮頓同維拉會係今季最有驚喜嘅兩隊,結果維拉真係好有驚喜,但白禮頓就同往年一樣,不過照而家咁睇佢地應該會上返嚟,而佢地套防守型嘅組織式踢法其實都幾有娛樂性幾好睇,所以大家不妨留意下,唔洗下下睇Big 6睇到悶。

如果喜歡我們的文章,請即分享到︰

標籤: 白禮頓  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→