【戰術狂想】應否回到順腳翼鋒時代?

非Big6看英超 於 09/01/2021 發表 收藏文章
話說筆者睇咗曼城對車路士場波,入面有件事今我印象好深刻,就係哥迪奧拿安排左腳嘅科頓打左翼同右腳嘅史達寧踢右翼,而咁嘅安排亦都係其中一個幫助曼城上半場輕鬆入3粒嘅其中一個原因。於是,筆者忽發奇想,係咪應該回歸到左腳打左翼、右腳打右翼呢?

記得以前睇波果陣,傑斯踢左邊,碧咸踢右邊,美斯初出道係踢左邊。但而家幾乎所有球隊都係右腳打左翼、左腳打右翼,翼鋒踢嘅職責屬於FM入面嘅內鋒或者逆翼鋒。近年最常用嘅陣容-4-2-3-1同埋4-3-3,兩隻翼嘅職責都類似前鋒,需要射門嘅情況比傳統翼鋒多好多,將翼鋒安排喺弱勢腳嘅位置,為嘅就係可以俾佢地「cup大位」起腳。錯腳翼鋒都實行咗一段時間,問題感覺上亦都慢慢浮現。

第1個問題就係邊路出波能力減弱咗。昵個問題嘅解決情況比較理想,除咗將出波嘅職責交俾閘位球員,亦都有訓練翼位球員2隻腳都要用,強勢腳射波弱勢腳出波。暫時睇都冇乜邊隊因為用錯腳翼鋒而大幅削弱咗邊路出波能力。

第2個問題就係翼鋒極之依賴,甚至可以話係唔願意用弱勢腳射波。以場波為例,喺曼城入第3球嘅攻勢,其實只要史達寧肯用左腳射單刀,就可以輕鬆搞掂,唔洗俾人逼到去禁區底又兜返出嚟,攞返落右腳先起腳,結果都係好彩執到雞先入到。史達寧就係喺錯腳翼鋒趨勢下,死都唔肯用弱勢腳射波嘅典型例子。佢之所以俾人話屎波,有一部分情況係因為明明係黃金起腳機會,但因為要用左腳所以唔射,結果未cup返右腳已經俾人偷到波。

哥迪奧拿今場特登反潮流行返傳統路線,我諗應該係為咗等兩閘收埋負責更多防守,所以將出波嘅工作交返俾翼鋒,不過咁嘅安排唔單止達到哥迪奧拿本來嘅目的,仲解決咗錯腳翼鋒經常出現嘅射門得1邊嘅問題。用返傳統嘅順腳翼鋒,就唔洗下下都俾人睇穿想cup大位,接應咗順腳嘅攻勢仲可以即刻射,好似曼城嘅第2球,科頓接應咗之後就可以即將個波送入網,如果果個係史達寧,佢一定會控住個波然後轉身攞個波落右腳先會起腳,要搞咁多嘢,就算冇俾人搶到都好,人家都預備好曬防守,入嘅機會一定比科頓就咁一個掃把腳低好多。

今次哥迪奧拿俾我嘅啟發係:係咪應該徹底淘汰順腳翼鋒嘅戰術呢?筆者嘅意思唔係話唔應該用錯腳翼鋒,只係覺得順腳翼鋒戰術冇需要喺頂級聯賽幾乎絕跡,雖然好多球隊都會喺比賽中途不停交換兩翼,但一般嚟講兩翼作為錯腳翼鋒嘅時間會比順腳翼鋒多。筆者覺得可以試下調返轉,間唔中以順腳翼鋒為主,例如喺需要更多時候由邊路進攻嘅比賽上,用順腳翼鋒為主負責出波多過射波,咁樣意想不到地微調戰術話唔定可以殺對手一個措手不及,好似今次哥迪奧拿咁。

另外,筆者有另一個啟發,專門向哥迪奧拿講嘅:「你不如考慮下以後用順腳翼鋒啦。我地球迷都睇得出佢屎波,你冇理由睇唔出嘅。既然你點都要出佢,咁不如擺佢落右翼,等佢唔好射咁多波,唔係你場場波都要抱住個頭大叫啦。」

以上戰術討論純屬筆者吹水和根據自己睇波經驗歸納出嚟嘅諗法,沒有任何根據,如有錯誤希望大家唔好介意,亦歡迎指正。

以上關於比賽嘅截圖來自 https://scontent-hkg4-1.xx.fbcdn.net/v/t1.0-9/136653754_2762036914014723_4024305124326364756_o.jpg?_nc_cat=103&ccb=2&_nc_sid=730e14&_nc_ohc=xQx1dxRSobAAX-810-T&_nc_ht=scontent-hkg4-1.xx&oh=afea075168f5433c3f07f3ce7a285dab&oe=601EDFDF

想知道更多英超英冠消息歡迎like我地嘅page: https://www.facebook.com/leagueinengland

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→