阿仙奴就一路進步，但是廠迷卻固步自封 精選

每年季尾，逢親輸波，阿仙奴都會成為網絡笑話，英國係，香港的網絡都係。應該出邊個球員，應該幾多分鐘換邊個，好似每個球迷都成為戰術大師，各位，而家社會係資訊透明，但唔係戰術透明，唔好以為睇幾條球員vlog，賽前練波，就以為自己好了解一間職業球隊嘅運作，唔係排下陣就代表你了解你愛隊的一切。

阿仙奴的群組，專頁好似成日都會成為網絡上的攻擊對像，自己廠迷嘅爭論又有，其他隊嘅球迷過黎冷嘲熱諷嘅都有。球迷本身係可以感性，可以有自己的意見，但唔代表要接受你質素差嘅留言，下下人地留言就睇人哋支持邊隊，就用「當時排名」，「顧掂自己球隊問題先啦」，「金錢足球」去罵人，見到有專面笑其他球隊使四億四大皆空，我都不禁想一想，隊隊英超前列都買人咖啦，2026年仲笑人金錢足球，你係咪全部平靚正加自己青訓先，心照啦。坦白講專頁就個個都讚好得，群組又要經批准先入得，好喇，咁係咪得曼城，上年利物浦，或者嬴咗你嘅球隊先可以話你？
答案又唔係咖喎，因為嬴你嘅，都係勝之不武，休息時間比你多，傷兵比你少，對方主場好難打，球證判決不公，中柱中楣唔好運，冇你心目中最佳排陣，甚至領隊都應該換，總之就大把理由，可能球迷諗住輸波失分圍爐取下暖，但係網絡就係咁殘酷的地方，你講得，人地見到就會笑你。
去到季尾自爆嘅問題，由以前12月自爆去到呢2年嘅4月自爆，亦係阿仙奴受到網絡關注嘅時候，呢個時候嘅廠迷，心態亦係最脆弱的，但係你失望還失望，就唔好將你嘅期望搬龍門，上兩季「坐二望一」，輸到得前四，你留言今季收貨「超額完成」？今季心雄到想做四冠王，去到輸咗兩個本土盃，笑個盃廢都算，話球隊根本冇心踢，你有冇尊重過你愛隊，一隊職業足球隊，而家話最重要嘅都係英超同歐聯，容祖兒就一變四，四變十二，你就四變二，二變咩就未知。
仲見到有網友留言話球隊四線根本應付唔黎，先唔講球隊今季有增兵，加上都唔係上季先又得打反歐聯啦。咁不如唔好打歐洲賽喇，本身打英超都焗要三線啦。仲見到有球迷：「今季話爭英超都可能係假象，亞達目標可能想爭歐聯先呢，話晒我廠都未贏過歐聯。」安慰又好，假膠又好，排第一都講啲咁嘅野，頭盔都可以當鞋著了；「我比較享受長期第二名。年年排第四第五名意味著球隊實力不夠好。」呢啲留言直頭變態。
大家球迷，亦有時會好似班主上身咁，輸波就會想換教練，廠迷由迷雲反雲年代已經係咁講，但係淨係outoutout，冇任何嘅建議「一係直接搵一個冠軍經驗嘅教練，無論係戰術上，用人上，臨場對應上，都要有冠軍級嘅表現，但係要搵呢啲教練係非常之困難！第二係阿迪達繼續執教，但係需要搵幾個有冠軍經驗嘅助教，去啟發阿迪達，幫助阿迪達開竅！」人選都冇個就炒炒炒，中三小組討論都教你要有建議啦，球迷我希望你開竅先。
坦白講，阿仙奴呢幾季嘅進步，係事實亦係有目共睹，我都認為，所有可以幫助取勝的方法，都係好方法，所以我其實係欣賞阿仙奴著重死球的戰術，加上一啲心理訓練，我相信對球隊係有利無害。不過，球隊就進步，球迷好似就無進步，下下笑其他球隊金錢足球，近況不佳，顧掂自己球隊問題先理阿仙奴啦，呢啲留言又點繼續討論呢？

勝敗乃兵家常事，呢個世界亦冇一支球隊只會全勝。學懂係低潮時接受同改進，往往俾找籍口來得有用，做page如是，做球迷如是，做人如是。