白百合之新晉鐵衛: 基斯甸羅美路

NGSICKBALL 於 07/01/2022 發表 收藏文章
啱啱對上一個夏季轉會窗,熱刺以先借後買方式,簽入阿特蘭大既阿根廷中堅基斯甸羅美路。唔少球迷都對呢位意甲最佳防守球員寄予厚望,期望佢可以代替遠走卡塔爾既艾達韋列特,更視佢為熱刺既未來後防領袖。

身高1米85,現年23歲既羅美路出身自阿甲球隊貝格拉諾既青訓。佢18歲既時候首次代表一隊上陣,憑住比年齡遠遠成熟既防守能力,淡定而出色既臨場表現,成功吸引唔少歐洲球會注意。2018年,20歲既佢加盟意甲熱拿亞。初登五大聯賽舞台,羅美路好快就以穩健既表現進佔正選中堅位置,更加協助球隊成功護級。之後佢就獲得祖雲達斯垂青,但因為人腳過盛,就將佢外借返熱拿亞。佢喺熱拿亞都繼續大熱大勇,喺防線一夫當關。

上季羅美路轉投阿特蘭大,攀上職業生涯第一個高峰。佢搶截、攔截、爭頂既數據都係意甲頭五位,當中成功攔截次數更係歐洲第一,榮獲球季意甲最佳防守球員。呢位年青後防大將擅長攔截,制空力強,踢法冷靜沉穩,閱讀球賽能力都唔錯。不過佢既位置感稍弱,有時會因為想搶奪對手控球權或者想參與進攻而壓得太前,令對手有機會打身後波。今季羅美路嚟到競爭更加激烈既英超賽場,喺熱刺繼續交出穩健既表現。當中佢場均既防守對抗成功次數,更加冠絕歐洲,不負意甲最佳防守球員之名。

相信有羅美路鎮守後防,熱刺既防守有望改善。不過球隊整體可唔可以回勇,就視乎一班進攻球員交唔交倒貨啦。

————————

中意睇我文章既
記得follow我Instagram @ng.sickball
標籤: 英超  熱刺  基斯甸羅美路  

留言


請按此登錄後留言。未成為會員? 立即註冊
    快捷鍵:←
    快捷鍵:→