不專業足球週記 (三) 精選

不專業足球週記 (三)
Omicron變種武肺侵襲香港，政府又出招，連本地球壇都不能避免收到影響，足總響1月5號就率先宣佈菁英盃理文對晉峰既賽事閉門作賽，然後1月7號至20號既賽事全部延期。呢樣野對熱愛本地波既球迷真係大打擊，而根據之前既經驗，20號之後隨時都係繼續冇得睇波既。球迷想睇波，就唯有睇外國波先喇。

而不幸既係，港足新主帥，前北韓教頭安達臣啱啱先完成隔離，準備大展拳腳之際，就遇到球市又停擺。佢要了解下髦下既球員，除左等下遲啲入場之外，就唯有自己去搵啲球王片去睇下喇。

講起港隊，受限於香港嚴格既抗疫措施，變左都冇乜友誼賽踢，而疫情又爆發，對香港隊備戰黎緊6月既亞洲盃外圍賽真係好大影響。究竟港隊能唔能夠響咁既情況之下由外圍賽脫穎而出，達成安達臣口中既短期目標，就真係好睇呢位前北韓教頭既功力。
初級組足總盃方面，南華半場落後一球比晨曦，但下半場憑住連拿度梅開二度、蕭柏霖同司敬熙各入一球，以四比一反勝晨曦。我仲有得南華真係要多謝南華SNG130打氣團喇，辛苦佢地每星期直播同cut精華。不過黎緊低組別聯賽應該又要抖抖，抖到防疫措施完先喇。

呢個星期歐洲球壇最大既花生梗係盧卡古事件喇。條友響冇知會車路士既情況下，接受意大利天空體育既訪問，又話自己唔滿意杜曹既戰術，又話自己其實想留響國際米蘭云云，結果比杜曹照完肺之後，連車利大戰都冇得出。最後，響同杜曹既所謂既會議之後道歉，似乎都會有機會解凍。不過解凍還解凍，對車路士同個人表現有咩影響，就真係時間先可以證明一切。

曼聯又輸一場。我唔太意外，冇期望冇失望。但係值得一提既係成兩年冇為曼聯一隊比賽既菲爾鍾斯響呢場比賽復出，表現仲可圈可點。佢同迪基亞真係唯二兩個可抬起頭步出奧脫福既球員。至於蘭歷克，睇黎真係吹大咗喇。
冷風唔止英超，西甲皇馬作客早段比基達菲入波，以一比零敗走，安察洛堤就屌球隊放緊假。不過驚咩吖，響西甲領先咁多，除非突然間崩潰既啫，如果唔係西甲冠軍都應該走唔甩。而佢地既宿敵巴塞就有啲麻煩，佢地雖然簽左費蘭托利斯，但係因為薪酬上限既關係，係註冊唔到住既。而同一時間，之前話會續約既丹比利又玩野唔續約，佢地而家真係好頭㾗嘞。

武肺當然影響埋歐洲球壇，上屆意甲冠軍國際米蘭作客博洛尼亞既賽事，因為博洛尼亞成隊比相關部門隔離而需要取消賽事。但呢單野同其他延期既賽事唔同既地方，就係意甲官方唔肯延期，好大機會直接判國米贏三粒。當然佢地可以上訴，所以國米係咪真係贏仲係未知之數。但老實講，梗係應該延期喇，痴線既咩，你估博洛尼亞真係想唔踢咩？成隊隔離緊有咩計？
暫時傾到呢度先，下次再見！

btw有興趣既可以follow下我:

ig: leafopen3
instagram.com/leafopen3

fb: leafopenleafopen
facebook.com/leafopenleafopen

個人網站: leafopenleafopen.com