係今個轉會期，不少英超前列球隊都大破慳囊買入不少球員，希望可以係競爭激烈的英超取得佳績，特別係今季除了爭標以外，前四歐聯位置預期亦會競爭激烈，一齊睇下今個轉會期十個最昂貴的球員。
(以英超球會買入的球員計)
10. 洛夫雲 Dejan Lovren (2000萬磅)
利物浦上季後防可謂非常不穩，羅渣士一直希望引入一名穩定性高的中堅加強防守，暫時洛夫雲加盟以來三場比賽尚算對版，未知將來可否成為利物浦新一個後防指揮官希比亞。
9. 拉爾拉拿 Adam Lallana (2500萬磅)
作為上季修咸頓中前場主力及隊長，再加上英格蘭國藉優秀球員買少見少，修咸頓當然絕不會平賣拉爾拉拿。最終拉爾拉拿以 2500萬磅轉會費離開效力達 8年的青訓球會。不過拉爾拉拿季前已經受傷，預計 9月初時才可以上陣。
8. 盧卡古 Romelu Lukaku (2800萬磅)
相比 big6球會，愛華頓亦以破球會紀錄的轉會費 2,800萬鎊購入盧卡古並簽下 5年合約。盧卡古上季外借時為愛華頓上陣 31場射入 15球，表現可謂十分出色。相信盧卡古將成為愛華頓今季主要入球來源。
7. 安達·靴里拉Ander Herrera (2900萬磅)
安達·靴里拉係其中一個新一代西班牙中場明星球員，曼聯為購入靴里拉加強中場實力，不惜以解約金條款約 2900萬磅由畢爾包簽下靴里拉，而靴里拉亦不負眾望，係熱身賽對洛杉磯銀河已經交出兩記助攻，但可惜第一場英超比賽已經受傷，暫時依然無法係英超證明自己實力。
6. 法比加斯Cesc Fabregas (3000萬磅)
當小弟一邊寫，一邊排球員轉會身價時，突然發現曼聯以 3100萬磅買入勞基.梳爾，而摩連奴以差不多的價錢購入法比加斯，3000萬磅當中有 2800萬磅的錢係賣走盧卡古得來時，小弟不得不佩服摩連奴，原來摩連奴除了戰術厲害，理財能力亦唔差。
作為前阿仙奴隊長及中場發電機，法比加斯已經證明過他的能力，相比 3700萬磅賣走馬達後以3000萬磅收購法比加斯，摩連奴的精明理財令人嘆為觀止。
5. 勞基.梳爾 Luke Shaw (3100萬磅)
勞基梳爾係曼聯今個轉會期第二人個購入球員，雖然不少人認為勞基.梳爾充滿天賦，不過以年僅19歲的球員而言，勞基梳爾的轉會費3100萬磅絕對係天價，另外傳聞勞基梳爾週薪更達16萬鎊，成為英超薪金最高的 u21球員，且看梳爾是否可以值回票價。
4. 文加拉 Eliaquim Mangala (3200萬磅)
作為億萬大軍的曼城今季反而沒有大灑金錢，主要購入球員只有後防中堅文加拉及防中費蘭度。不過23歲的文加拉成為英超身價最高中堅，打破了里奧費迪南的 3,000萬鎊的紀錄。
3. 迪亞高哥斯達 Diego Costa (3250萬磅)
今季車路士的買賣可謂非常明智，只係以 3250萬磅就購入上季馬體會奪冠的重要球員迪亞高哥斯達，毫無疑問這次交易可謂「超級抵買」。
迪亞高哥斯達上季係西甲射入 27球，只僅次於 C朗拿度及美斯，今季轉會車路士到目前為止 3場英超比賽已經射入 4球，相信無人會懷疑這次交易。
2. 阿歷斯山齊士 Alexis Sanchez (3300萬磅)
今季阿仙奴領隊雲加可謂一改過往審慎理財原則，購入阿歷斯山齊士、迪保治、張伯斯幾名球員，當中阿歷斯山齊士身價更達 3300萬磅，成為今季英超第二貴身價球員。
阿歷斯山齊士上屆為巴塞係西甲射入 19球 10個助攻的雙雙數據，加上山齊士現年只有 25歲正值黃金時期，相信 3300萬磅依然係一個合理價錢。
1. 迪馬利亞 Angel di Maria (5970萬磅)
作為今個轉會期的英超「標王」，迪馬利亞以打破英超轉會費紀錄5970萬磅由皇家馬德里轉會曼聯，而迪馬利亞更會穿上令人期待，具象徵意義的七號球衣。
迪馬利亞應該係今個轉會視窗其中一個最多人討論及爭議的轉會，不少人例如前曼聯中場韋健士 Ray Wilkins認為曼聯應該需要防守球員而非進攻球員；不過亦有不少人支持這次轉會，例如加利尼維利、C朗拿度都認為迪馬利亞可以取得成功。作為上季皇馬贏得歐聯重要功臣，且看迪馬利亞能否改善曼聯今季成績。
註: 轉會費主要根據英國當地媒體及 transfermarkt.co.uk。
覺得小弟寫得都 ok的話或者想要更多 Liverpool資訊，可以到 facebook 專頁按個讚，支持下啦。https://www.facebook.com/myheartisredlfc
請按此登錄後留言。未成為會員? 立即註冊