[M9小評]敗走白鹿徑

曼聯專區-M9隨筆 於 11/04/2016 發表 收藏文章
10/4/2016 第33輪
熱刺VS曼聯
賽果:
3:0
熱刺:69'阿里,73'艾達韋列達,75'拉美拿
曼聯:

賽前熱刺落後榜首打多一場既李斯特城10分,呢場賽事必須全取三分,否則要拎英超冠軍機會極其渺茫。另一方面,曼聯歐霸出局後,只能靠聯賽前四黎獲得下屆歐聯席位,假如唔能夠達到呢個目標,雲高爾將會好大機會被辭退,曼聯賽前落後聯賽第四名打多一場既曼城4分,要追過曼城依然唔係無可能,今場對雲高爾黎講要全力搶分。

陣容:
迪基亞
科素文沙 史摩寧 白連特 洛荷
舒拉達連 卡域克
馬達 達加特 馬迪爾
拉舒福特
迪基亞:
維持一向水準,所失三球都係無得救,係下半場中後段曼聯球員疲態盡顯時守出多球關鍵球,唔係佢曼聯可能輸更多。
科素文沙:
呢位18歲年輕小將以右閘身份正選上陣,有令人眼前一亮既感覺,可攻可守,進攻方面,上半場初段多次右路個人突破,而同馬達右路配合亦有踢出不少威脅。防守方面,文沙多次成功防守對面左路球員既攻勢,可惜係62分鐘一次飛鏟中同阿里鏟到對方,要到場邊接受治療,最後係66分鐘被達美安換下,之後連失三球,可見其重要性,科素文沙絕對係今場曼聯既最佳球員,日後必成大器,希望佢只係小傷。

達美安:
後備入替文沙既達美安表現只係一般,防守上面維持一向穩健既水平,上前助攻方面依舊威脅不大,不過佢上陣既時候馬達都已經無咩氣,唔能夠全怪佢。

史摩寧:
維持今季出色既表現,釘到哈里簡尼實一實,亦係今場簡尼無波入既一大原因,不過係69分鐘一次争頂中同白連特撞成一片搞到無人防守,被阿里接應艾歷臣傳中射入,導致失球,所以白連特同佢都要負上一定責任。
白連特:
作為替工中堅既白連特似乎已經唔再係曼聯後防既炸彈,再一次防守出色,57分鐘單對單成功防守簡尼,亦多次擋出傳中球,69分鐘既失誤可以話係美中不足,希望佢繼續維持到出色既表演,成為曼聯另一個穩健既中堅。

洛荷:
今場洛荷既表演可以話係最失色既一個,先講防守,只係一般,係熱刺右閘獲加不斷施壓下處於下風,進攻方面,洛荷勇於帶波上前場,同馬迪爾既配合只係一般,受制於洛荷出波質素差,往往只能夠出一D無威脅既中下腰波,次次都被對方輕鬆擋出,曼聯既進攻核心嚴重偏重係左路,但係只靠馬迪爾一個既個人突破係唔夠,左閘球員都必須要有出波能力,下半場中段開始出現疲態,係73分鐘防守角球既時候Mark唔實艾達韋列達導致失球。
舒拉達連:
表現中規中舉,有幾次唔錯既截球,無咩特別既表現,下半場有隱形既情況出現,留意到幾場佢都有集中力不足既問題,死球角球經常走漏人,希望佢能夠有改善。

卡域克:
呢位34歲老將體力明顯跟唔上比賽,接近0長傳0致命直線既傳球,只係有參與防守既工作,除上半場初段傳送較多外,其餘時間大多隱形。
馬達:
近幾仗馬達都被雲高爾放係右中場位置,明顯威脅比踢攻擊中場少,上半場初段有幾次進攻同文沙配合得唔錯,上半場亦好落力參與防守,不過佢體能下趺好快,下半場好快已經隱形,加上曼聯球員體能下趺,以致曼聯防守不斷出現失誤,結果要到76分鐘失到第三球先至由迪比入替。

迪比:
完了吧,如無意外,相信曼聯球迷唔會再對迪比有任何期待同希望,對上一次踢得好,都只係歐霸對上米迪蘭特這支丹麥聯賽球隊,迪比既每一次後備上陣,都令曼聯球迷帶黎「驚」起,不斷傳球失誤,81分鐘發生左段小插曲,洛荷長傳,迪比同獲加追波,其中獲加有小小拉衫動作,最後令迪比追唔到個波,迪比同獲加互相推撞發生衝突,搞到兩隊球員去分開佢地,球證甸恩比左佢地每人一張黃牌,事情先至完結,其後佢更被主場球迷不斷渴倒彩。

連加特:
今場被放到攻擊中場既放置,優缺點其實好明顯,達加特既勤力同速度係上半場表現亮眼,多次從對方中場球員腳中搶到波,唯獨有時一味死推,又或者處理得唔夠好,缺少左馬達同靴里拉果種傳致命直線既傳球,佢今場只係有一腳禁區頂射偏左既射門,可惜下半場體能下趺太快,令到中場防守大開,不斷比熱刺反擊。
馬迪爾:
作為今季曼聯入球最多既射手同埋進攻大核心,馬迪爾今場不斷係左路施壓,當中係61分鐘,馬迪爾個人突破左3名防守球員後起腳,可惜射得太正,被洛里斯沒收,不過呢下突破真係好精彩,其餘時間大多有多過1名防守球員去防守馬迪爾,以致佢都無太多起腳機會,下半場體能叫做支持得最好果個,抵讚!

拉舒福特:
再一次正選上陣,不過今次踢得半場,上半場以其速度同埋同馬迪爾既配合帶比對方後方不少壓力,中場時被楊格入替,呢個調動好似有D過早,之後會講到,Anyway,踢左正選咁多場,起碼有得比佢休息下。

楊格:
傷愈後首次上陣,好有趣地楊格今次係以中鋒身份入替,但係係眾曼聯球員體能大趺之下,曼聯既進攻愈來愈少,佢表現既機會更加少,而同馬迪爾既配合明顯唔夠拉舒福特同馬迪爾咁順暢,不過佢係傷愈後首次上陣,所以表現尚可接受,令曼聯係進攻方面有多一個球員既選擇。

下場曼聯將會係主場對上榜尾既維拉,真係好希望曼聯能夠争氣一次,大炒對手,唔好再要曼聯球迷激到嘔血!

如果喜歡我們的文章,請即分享到︰

延伸閲讀:
[M9小評] 小勝維拉

留言


請按此登錄後留言。未成為會員? 立即註冊
  • Huang Ka Sing 於 11/04/2016 評論 NO. 1

    推 好評

  • 博文 於 11/04/2016 評論 NO. 2

    你有無睇波咖?左閘?左你呀媽咩,仲諗緊你係咪打錯字

  • Matthew曼聯 於 11/04/2016 評論 NO. 3

    睇完波寫埋4點幾鐘 攰中有錯 包容包容

  • 博文 於 11/04/2016 評論 NO. 4

    我都激動左 sorry

  • 鴻池光 於 11/04/2016 評論 NO. 5

    我比較care呢句「曼聯官方都講左只要有球會出價2500萬磅就會賣走迪比,可以話迪比係曼聯既生涯正式玩完。」。請問where's the source?

  • 你喜歡 於 11/04/2016 評論 NO. 6

    有待改善,加油!

  • Matthew曼聯 於 11/04/2016 評論 NO. 7

    oh Sorry 原來係The Sun既News ,姐係9up,再次犯錯mislead左其他人 ,Sorry 已修正

  • Matthew曼聯 於 11/04/2016 評論 NO. 8

    感謝各位既包容同意見,小弟會繼續努力提升質素!

  • Sam_arsenal 於 11/04/2016 評論 NO. 9

    很詳細的分析 加油!

  • 鴻池光 於 12/04/2016 評論 NO. 10

    加油,所有曼迷都樂見曼聯區有更多優秀文章面世

快捷鍵:←
快捷鍵:→