曼聯專區小評：華倫西亞？雲高爾的出奇蛋 精選

又要講呢句開場白：世界盃期間，大家都睇波架啦！所以好多球會新聞都沉底ing上唔到水面。不過，華倫西亞續約三年呢單「大新聞」，真係好難唔知，因為真係睇到眼都突。究竟雲高爾放呢隻出奇蛋出嚟，搞咩呀？

如果要講華倫本人呢，喺曼聯「三大翼鋒」(加埋蘭尼、楊格)之中，技術係最差嘅一個，不過重要性偏偏又係最強的一個，而且曼迷對佢嘅評價亦係最好嘅。無他，佢其實真係算幾勤力、速度又驚人，全盛時期與拉菲爾可以玩哂條右路攻擊線，係曼聯的其中一招殺著。而2011-12年，朗尼攻入34球入面有好多都係佢助攻嘅。不過呢啲「功績」，都已經係兩年前的事了。
呢兩年佢真係全面跌watt，見親佢都要大叫hair jam(好驚)，甚至筆者有諗過不如搵E華倫西亞換佢好過啦…一方面佢技術已經見底，得個快字，防守球員一早睇通哂，企定定就已經截哂佢波；而且傳波質素下降，往往斬波都過唔到第一位防守球員，喺扭又扭唔掂、斬又斬唔出的情況下，出佢可以話係自我癱瘓右路。另一方面亦係最重要的，是信心下降。佢自從眼濕濕交返件「靚仔專用七號波衫」出嚟之後，狀態一直浮浮沉沉，可以話係因為壓力太大。咁講法，同一個已經跌watt打唔返水準的球員續三年約，究竟為咩？

其實雲帥喺荷蘭國家隊都已經派緊出奇蛋，用人方面荷蘭隊有唔少其實係名不見經傳的後生小將，而且好多都只係於本土荷蘭聯賽揀出嚟，無咩大賽經驗，助攻雲佩斯絕世頭鎚的戴利白蘭特(Daley BLIND)就是其一。用呢一班人都已經打到西班牙散哂，咁唔通雲帥有我哋都唔知嘅方法去用華倫？
以筆者平凡人的睇法，雲帥用華倫西亞最大可能性有二。一係引入532陣式，將左右後衛推上少少作為轉守為攻的殺著，以「防反」改革曼聯成遇強越強的「反擊隊」。咁嘅情況之下，拉菲爾同華倫西亞都會係右路的重鎮，二人互為替補，以高速策反，同時為中場的三位球員拉開空位。另一個可能性係打433陣式，以左右翼力爆落底，為雲佩斯等唔算快的前鋒提供供應。

不過呢啲都係平凡人嘅睇法，雲帥教荷蘭時已經不斷帶出奇蛋俾大家，究竟華倫西亞呢隻蛋入面可以有啲咩？都係要等雲帥砌俾大家睇下喇！
呀~~續約喇~~7號下季有無人著呢？
雲高爾：喂，要唔要出奇蛋？送隻俾你啦！
我諗咩？你哋唔明架喇！其實...E華倫西亞都幾好XD