曼聯專區小評：新歷史戲碼「爵規莫跟」 精選

今日同大家講個歷史故仔，希望唔好悶親大家。好耐好耐之前，有個好很勁嘅宰相，佢個名叫做蕭何。佢有幾勁？無嘅，幫漢高祖劉邦平定天下兼定天下法制，ok勁咁啦！不過佢都係人，總有一死，臨走之前指名要將軍曹參做宰相。而呢個時候，皇帝都轉咗人，由漢惠帝做阿頭。而曹參唔知點解，好似鬆弛熊咁懶懶閒咩都唔做，漢惠帝就去問佢搞咩，於是就出現咗一段經典對話：

漢惠帝：你咩都唔做，睇少我係唔係？
曹參：阿頭你問下自己先，你勁啲定你老逗阿高祖勁啲？漢惠帝：梗係…我老逗勁啲…
曹參：咁你又認為，蕭何勁啲定我勁啲？
漢惠帝：坦白講，你差啲囉。
曹參：咪就係囉。你老逗同我師兄蕭何都勁啲，佢哋都打穩哂根基，我哋無謂亂嚟啦！跟佢哋嗰套無死嘅。

無錯，呢個故事就係好鬼出名嘅「蕭規曹隨」喇。就係因為曹參跟住上手點做，於是咪無咩事，天下太平囉。不過今日，就真係出咗事喇。邊個出事？之前有個叫大衛基爾嘅皇帝，手下有個叫費格遜嘅宰相，做咗26年咩都上哂軌道。點知佢金盤洗手，皇帝又走埋，新嚟嘅皇帝艾活華已經麻麻哋，係位生意人淨係識「度縮」；而宰相就搵咗個叫莫耶斯嘅嚟。電視劇入面嘅蕭何
現實嘅蕭何
佢哋應該唔知咩叫歷史，所以莫耶斯一嚟就殺哂啲舊臣，將舊嘅訓練團隊一次過換哂。之後就叫自己啲馬仔用自己嘅方式做事，點知跟佢嗰套就出哂事，人腳就無變喇，不過精神面貌就差哂，明明大將軍雲佩斯英明神武、仲有個驃騎將軍肥仔朗尼好打得，家下大將軍次次出征都無糧草、無供應，仲要次次都練兵時整親，無計，因為宰相鍾意亂咁訓練。
大將軍雲佩斯同宰相莫耶斯飛將軍朗尼

總之要就怪宰相無自知之明啦！其實一開始宰相大人學下「蕭規曹隨」咁「爵規莫跟」(可能就係聽咗呢句所以唔跟…都話架啦，「爵規摩跟」會好好多！) 咁就唔會引起咁大變動，人心惶惶啦。上哂軌道咯，先至暗殺、陰乾咩都好啦，慢慢清理門戶、換自己班底囉，呢個天下遲早都係你嘅。咁多年歷史都教訓我哋殘殺功臣通常都無咩好結果，家下急功近利有咩結果大家都明明白白啦。
最慘係咩？我哋班老百姓囉，明明好鬼愛國，見到個國家搞成咁，又唔可以唔繼續支持艾活華同莫耶斯，咁就惟有繼續睇下點樣中衰啦…中興？等下啦，未有咁快，衰夠就有機會喇！
係唔係睇唔夠歷史書呢？不過...我後生踢波架咋wor...