莫帥來了！「呢排我要打兩份工！」 精選

曼聯新帥莫耶斯正式開工的日子是7月1日，數數手指仲有41日先到，不過尋日早上曼聯就出現咗佢嘅身影！而身邊嘅，仲有費格遜爵士同kit manager摩根添！消息人士話，莫帥今次係嚟睇下環境嘅，有爵爺陪同之下先到卡靈頓訓練基地，兩人密密傾密密傾，最後仲同車一齊走！

之所以可以提早嚟睇睇，皆因英超煞科之後莫耶斯都無咩任務喺身，又無理由再為愛華頓未來建軍繼續努力，所以就同拖肥糖傾掂數，提早去曼聯行下睇下囉！過程中爵爺全程在場，摩根亦做埋柴可夫司機，三人有傾有講，氣氛非常輕鬆。雖然未知莫耶斯有無同曼聯球員見面，不過莫帥同爵爺交情不淺，加上退休後爵爺仍然會留在曼聯做其他工作，所以未來對莫帥的幫助、指導應該唔少嘅。

莫帥就咁講：「未來幾個星期我可能要同時打兩份工，好遺憾我要離開愛華頓喇…睇下拖肥糖啲球員，除咗希拔同奧斯文之外，其餘個個都係我親自帶嚟架！以我哋嘅人腳，愛華頓已經係竭盡所能爭取前四的排名喇…三周前仲有機會嘅，不過最後都係失望而回…下星期我會同愛華頓交接，無論邊個接手我都會將事情交代得清清楚楚！希望我離開之後一切如常，唔駛驚，新領隊喺大廳！」
爵爺：我夠鍾返屋企喇！莫帥：交個場俾我啦！