eBay突現爵爺最後一「膠」 精選

爵爺的重要標誌，莫過於佢嘅香口膠！就連筆者外婆唔知邊個係爵爺，都會趁筆者睇波時問一句：「嗰個死趙香口膠嘅鬼佬呢？佢係唔係曼聯架？」所以當佢退休之後，在教練席上咬口香糖嘅老人家亦成為大家嘅集體回憶。而有曼聯球迷就別出心裁，聲稱自己搵到山楂球場入面爵爺最後一塊「嚼膠」！

嗰位球迷將呢塊香口膠放喺一個有機玻璃盒入面，放咗喺eBay賣！仲寫住：「極度稀有物品。從西布朗山楂球場收集得到，放在有機玻璃/木盒中。非官方商品，據傳係費格遜食過。作為曼聯領隊食住香口膠、睇嘅第1500場比賽，呢舊就係佢食過嘅經典第1500粒香口膠。」距離拍賣結束仲有9日，曼聯球迷已經開始瘋狂搶購！

來自著名網站joe.ie的發言人表示：「我哋對此有懷疑，唔知係真唔係。不過即使只係一個玩笑，都係精心設計過、度過嘅玩笑，好有心。在比賽中食香口膠係爵爺的個性，正如他的火爆脾氣一樣。如果呢舊嘢係真嘅，可能多年後我哋可以用佢入面啲口水複製一個爵爺出嚟！」

第一，如果真係要複製爵爺，其實可以問佢攞頭髮，唔駛用香口膠咁核突…而第二，就係呢個拍賣已經消失咗，筆者千方百計都搵唔返佢出嚟…唔知係俾人買咗，定係爵爺申請咗專利，唔俾人賣佢舊膠呢？真係無人知喇…不過講返轉頭，如果大家想懷念下爵爺，不妨食塊香口膠？你班友！無聊！