曼聯專區小評：「雙紅會」球星對對碰 精選

「雙紅會」今晚8:30就開波喇，場波除咗要RESPECT96名死難者之外，戰場上賽果、過程等一舉一動，都會係球迷焦點，專區特登抽咗呢位球星出嚟，同大家對比一下…

(1)英軍新星——史達寧 VS 基華利

17歲嘅史達寧，絕對係今年利物浦暫時爆咗出嚟嘅新星，睇過幾場利物浦比賽，史達寧晌左路經常以速度切入中路，個人技術唔差，可帶波過人、唔多上腳，簡簡單單交波就走位，係現時利物浦中場較有爆發力嘅一點，而且仲有經常回防防守。有睇過佢表現嘅，都會明白點解佢可以晌唐寧同軒達臣手上取得正選，佢嘅表現，仲令佢對烏克蘭一役中入選英格蘭大軍。講到英格蘭大軍，曼聯近期亦有中場成為英軍焦點，當然就係基華利，雖然唔知佢今場波有無正選打，但基華利晌曼聯打中場中表現好有效率，對富咸場波仲有成90%傳球成功率，晌中場全場經常上落，表現絕對係實而不華，只係射門、長傳同控制節奏上略欠火喉，但如果曼聯今場目標同對方搶中場，相信費SIR就大有機會派佢落場多過史高斯。
(2)西班牙門將——連拿 VS 迪基亞

唔係筆者係曼聯FAN先咁講，但連拿今季晌利物浦表現應該係加盟而嚟最差，今年出現過嘅MSITAKES同接波甩手，正如對阿仙奴及赫斯一役，就肯定近幾季都無咁嘅表現，利物浦現時排17位，佢都應該要負少少責任，雖然唔知係唔係利物浦轉打地面波而佢未適應，但晌曼聯球迷角度睇，當然希望佢繼續咁嘅表現，總好過見到佢上身救晒所有波。迪基亞同樣今年犯過錯，晌對富咸一役同維迪誤會後，就被費SIR以連迪加特取代，上場加拉塔沙雷復出，表現好好，救過唔少波，佢嘅反應、救近OR遠射方面都無問題，只係高空波仲需要時間，但利物浦今年轉打地面波，連卡路爾都借走，用高空波攻門應該唔會有好多，只要佢今仗可以保持到對加拉塔沙雷嘅表現，曼聯後防就會大有信心，佢仲可以再進一步奠定佢正選之位。