碧咸下一站係上海申花? 唔係呀…

曼聯專區 於 31/12/2012 發表 收藏文章
碧咸決定離開洛杉磯銀河後,佢下一站落腳點一直都係球迷關注嘅消息,經過咗同家人度過一個溫馨嘅CHRISTMAS之後,有關佢轉會消息又再傳出,今次最新同咸爺扯上關係嘅,係中國球會上海申花…
晌美國度過咗6年足球生涯後,碧咸決定離開美職聯,但佢無諗過退役,而係準備尋求職業生涯嘅最後一次挑戰。而佢離隊消息傳出後,來自英格蘭、法國、巴西、俄羅斯同中國嘅球會,都被外界將佢扯上關係,而最近傳得最「行」嘅就係法乙球隊摩納哥,據稱碧咸嘅薪金要求已經嚇退咗呢支法國球會。而英國《每日郵報》就報導,中超嘅上海申花成為最熱門落腳站,事關盛傳該球會準備為碧咸開出25萬英鎊嘅周薪,加上佢晌場外嘅商業合同,仲可以為碧咸帶嚟2000萬英鎊嘅收入,呢個咁吸引嘅人工,令碧咸一家正在考慮當中。
碧咸希望轉戰另一個足球市場...

當中有內部知情人士就話喇,「碧咸已經成功打入歐洲同美國市場,佢依家面前有機會開拓中國市場,對佢嚟講係一個巨大嘅決定。碧咸想晌足球圈經歷最後一次挑戰,但去中國並唔係僅僅係職業生涯嘅挑戰,佢仲可以將碧咸自己嘅知名度推向一個更高嘅位置。」
碧咸已成功令自己打入美國市場...

小評:
之不過成篇文章有一樣嘢係無提過嘅,就係申花嘅財政狀況同股權風波嘅醜聞,大家都知申花嘅財政問題一直係傳媒焦點,雖然佢哋依家隊波坐擁安歷卡同杜奧巴兩大前車仔前鋒,以咁嘅叫座力,當然吸引到碧咸加盟,之但係一直盛傳佢兩大球星都被拖欠薪金而要離隊,更有傳過杜奧巴為咗追薪金,晌備戰非洲國家盃期間都要飛返上海追數…如果拖欠薪金傳聞一切屬實,申花仲邊度有財力吸引碧咸加盟? 另外,一向視家人如命嘅碧咸,一切以家人為先,當中包括各位仔女嘅學業等,到時佢又肯唔肯舉家去到中國生活? 亦係另一個疑問。
碧咸之後嘅波衫NO會係幾多號呢???
咸爺,你嘅下一站究竟會係邊度呀?

如果喜歡我們的文章,請即分享到︰

標籤: 碧咸  曼聯  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→