曼聯專區小評：「最有機會成魔大獎」花落誰家？ 精選

唔買人，唔買人，唔買人。呢一個一向係曼聯一月轉會市場的慣常動作，今年爵爺都係咁講：「唔駛因為轉會市場開而心跳加速，我唔會買人！如果傳媒傳咩我哋就買咩，咁我哋嘅陣容將會係世界之冠！唔係質素，而係人數！我對依家的人腳好滿意，就算要買，都只係會買有潛質的年輕球員。」
不過佢有佢話唔買，傳媒有傳媒自己傳，呢個就係2012年完結前最受傳媒歡迎、成魔大獎五位候選人：

一號候選人：禾確特
情況同上年雲佩斯一模一樣，又係最後一年約，又係唔肯續約，剛剛帶領阿仙奴大勝一場的禾確特唔經唔覺已經成為兵工廠一員7年：不過都只係23歲。有實力、而且地位日益增加的禾仔要求周薪10萬英鎊，而呢份合同一簽，就等同佢已經成為新一代槍王！不過呢位小槍王原來一早已經受爵爺垂青，今時今日有老槍王在陣，對禾仔而言加盟確係吸引。再加上蘭尼去留成為未知之數，禾確特成魔就算唔係一月轉會市場的焦點，亦一定係年中轉會市場的焦點。
二號候選人：C朗
遊子在外，浪蕩西甲；c朗由爵爺一手提拔、裁培，小小的一名黃毛小子長成世界足球先生，更得到摩連奴的賞識、亦試過擊敗地上最強、攞過西甲冠軍，不過呢位浪子好似總係有啲唔開心。從個人數據、榮譽，C朗一直被美斯壓倒，在同一個舞台上好似總係比唔上。從種種跡像來看，佢喺皇馬的確唔開心，仲傳佢啱啱同皇馬拒絕續新約，要真正超越美斯，可能真係要離開西甲，由另外的一個舞台展開新的挑戰先係方法。咁睇，返奧脫福可能係出路之一：如果唔提9600萬歐元紅魔點都俾唔起的現實…
三號候選人：利雲度夫斯基
多蒙特的強大射手、香川真司的前隊友利雲度夫斯基，嚟到有朗尼、雲佩斯、小豆的曼聯有無發揮機會？答案係：有！雲佩斯係禁區之狼，不過無人幫佢其實好難打出身價，有一位摧毀對手防線的搭檔就最好；朗尼自己就越打越後，成為攻擊中場甚至防中的趨勢越來越明顯；小豆做後備殺手有餘，但仍未夠火侯擔大旗。所以利雲度夫斯基絕對有成魔的價值。1800萬鎊的轉會費抵唔抵？你話呢？

四號候選人：麥斯曉姆斯
麥斯曉姆斯對曼聯而言，是後防的重大投資。里奧年紀漸大、維迪傷病不斷，單靠伊雲斯、鍾斯、史摩寧，後防總係有隱憂。身高1.91米，體重88公斤的麥斯曉姆斯身體對抗性強，無疑是里奧接班人的上佳選擇。
個個同香川都有一手噃(???)...
五號候選人：拜恩斯
後防中，除了中路的隱憂，左邊艾夫拿一夫當關亦是問題之一。拜恩斯由季初轉到今日，加上法比奧、畢特拿大器未成的情況之下，攻防俱佳的拜恩斯無疑是最適合的一顆棋子。

睇完成魔大獎五位候選人，大家投咗票未呢？不過點投都無所謂，因為呢場都係造馬show，贏唔贏到唔到我哋話事，最終得獎者都係由爵爺內定。更何況，內定完仲要睇下出唔出得起錢、人哋又肯唔肯放人。所以2012年完滿結束，邊個攞獎？是旦啦！支持曼聯繼續佔領榜首最重要！我哋內定就算啦！