蘇斯克查再做臨時主帥？ 今次蘇帥未必係救命稻草 精選

據外媒報道，隨住 艾摩廉（Ruben Amorim） 突然被曼聯辭退，曼聯管理層再次陷入「臨時主帥」嘅難題。現階段，由 費查（Darren Fletcher） 暫代領軍，但更大嘅焦點，已經落喺一個熟悉名字身上——蘇斯克查（Ole Gunnar Solskjaer）。

呢位曾經帶曼聯「短暫回春」嘅挪威教頭，被視為臨時接掌嘅主要人選之一。不過，問題係：今時今日嘅環境，仲容唔容許歷史重演？


2018 vs 2026: 形勢已完全唔同

喺 2018/19 球季，蘇斯克查接手時，正值 摩連奴（Jose Mourinho） 被辭退嘅低潮期。佢以臨時主帥身份打出一波連勝，迅速凝聚更衣室，最終成功「坐正」。

當年佢頭九場聯賽對手，包括卡迪夫城、哈特斯菲爾德、富咸等下游球隊，賽程可以話相當「友善」。亦正正因為呢段走勢，令曼聯重新建立信心。

當年蘇帥能夠成功，好大程度係因為「賽程紅利」。對比返而家嘅局勢，如果蘇斯克查再次回歸，佢面對嘅挑戰將會係「地獄級」。
根據賽程，若蘇斯克查再度上任，將要連續面對 曼城、阿仙奴、熱刺、阿士東維拉 等強敵，仲要作客新主場嘅愛華頓。對一支仍然摸索方向嘅曼聯而言，簡直係惡夢。

喺球迷之間，討論聲音分化——
有人想見到蘇斯克查回歸；
有人支持 卡域克（Michael Carrick）、雲尼斯達萊（Ruud van Nistelrooy），甚至認為應該由費查做到季尾。


但曼聯球迷應該討論同質疑嘅，係 韋確斯 (Jason Wilcox) 為首嘅管理層。喺一個講求系統化嘅足球世界，佢哋一邊搵個崇尚特定陣式嘅教練，一邊又干預戰術，搞到球隊不倫不類。如果搵蘇斯克查返嚟只係為咗穩定軍心，而唔係有長遠計劃，恐怕只會消耗緊呢位傳奇射手嘅名聲。