【東方亞冠之路】 水原三星 5:0 東方

香港足球 於 12/04/2017 發表 收藏文章
【東方亞冠之旅】 水原三星 5:0 東方


東方第2場作客嘅亞冠比賽,遠征韓國水原市但可惜未能取分而回,以5球大敗對手。面對上場亞冠嘅同樣對手,東方今場排出4-5-1 嘅陣式,並以『新援』吳偉超代替停賽嘅羅拔圖。

上場東方主場全場受壓下尾段被對手攻入一球,未能搶分。今場水原三星亦一如所料主導比賽,但隊長廉基勳及隊友先後錯失機會,包括射失早段嘅一次半單刀,令入球要到上半場尾段先出現: 37分鐘,朴己東禁區外嘅遠射被葉鴻輝撲出,但個波卻再落喺對手腳下,即時傳中並由廉基勳頂入,東方落後1-0。及後水原再有機會擴大比數,40分鐘廉基勳嘅單刀機會,但被及時回防嘅『王子』將波清走,水原三星半場領先一球。

下半場開段東方雖然形勢有改善,但攻勢依然少之又少。59分鐘,廉基勳開出罰球,閔尙基門前衝頂但又唔中目標。65分鐘,東方再度失守:李容來左路傳中,揾到伏兵禁區邊嘅權昶勛抽射入網。及後水原換入嘅莊拿芬更分別喺74同76分鐘把握東方失誤同一次反擊機會,個人梅開二度,東方輸到第4球。79分鐘,水原球員禁區內被侵犯,雖然球證冇表示,但權昶勛無人看管下從後射入今場比賽嘅第5球!83分鐘東方難得嘅反擊機會,但洛迪古斯同菊盈智均未能接應隊友嘅傳中,錯失破蛋機會。比賽補時階段,莊拿芬禁區接應傳中跳頂,但葉鴻輝將呢位外援嘅帽子戲法『撲走』,最終東方以5球大敗韓國代表水原三星

東方今場第二次亞冠作客,同時亦係第二次大敗於對手。雖然東方實力與同組對手有唔少差距,但今場嘅表現的確較上場差。而今場東方嘅防守紀律喺羅拔圖嘅缺席下失色唔少,多次走漏對手,如果上半場水原三星冇多次錯失機會,東方可能已被射入8, 9 甚至10球。另外 下半場開段東方球員亦開始出現體力不足嘅情況,反映東方球員嘅體能,防守意識與對手仍相差不少,有待加強。雖然東方出線機會已近乎渺茫,但筆者仍希望東方能夠好好珍惜剩下嘅2場亞冠比賽,唔好令球迷失望,為香港爭光!

圖片來源 東方足球會FB專頁

請支持香港足球 即likeFB page!



如果喜歡我們的文章,請即分享到︰

標籤: 東方  亞冠  香港足球  

留言

會員
我要評論
請按此登錄後留言。未成為會員? 立即註冊
  • Simon Suen
    Simon Suen 於 13/04/2017 評論 NO. 1

    They have Korean Beef & Abalone all the time . What about us ?

  • Kel Mik
    Kel Mik 於 13/04/2017 評論 NO. 2

    改極都系陪跑命

  • Daniel Cheong
    Daniel Cheong 於 13/04/2017 評論 NO. 3

    都係打番亞協杯算吧啦,無為自取其辱!

  • Lee King Yiu
    Lee King Yiu 於 13/04/2017 評論 NO. 4

    咁多年……仲期望改善?嘥氣

  • Tsang Kwong Yip
    Tsang Kwong Yip 於 14/04/2017 評論 NO. 5

    首先唔好講任何一隊波嘅成績,香港足球水準,同人哋日、韓相比,就好似一個足球碌緊落山,撳都撳唔住,人哋日、韓就一步一步爬緊上山頂,一再創造高峰好成績,香港呢?港超聯攪緊全職業足球,突然就接受大陸球隊嘅青年軍加入超級聯賽,又接受100%業餘嘅港會,因為怕隊數唔夠,所以就可以放棄原則,改進一定冇香港份啦!.....『知道有不足,就要去改進!』呢啲肺腑之言,喺絶對唔啱香港足球,因為香港只有『接受倒退,明知顧犯!』

快捷鍵:←
快捷鍵:→