科芬拿 (Wesley Fofana) 又又又提早收咧，對車迷嚟講可能已經唔係新聞。但喺佢再次倒下之際，傳出由迪沙比 (De Zerbi) 帶領嘅馬賽對佢有興趣，仲話車仔考慮緊放走呢位身價達 £70m 嘅「玻璃人」，就真係有啲花生味。
加盟近三年，大半時間同傷患搏鬥，長期佔據球迷戲稱嘅「文員部總經理」寶座，究竟呢位高價中堅嘅史丹福橋生涯係咪同安宮古一樣走到盡頭？今次我哋就由佢今季點樣「自討苦吃」講起，再深入探討佢嘅傷患紀錄、潛力與現實嘅落差，以及點解話放走佢，可能係一個無奈但理性嘅結局。
今季回顧：舊患未癒，「自討苦吃」再收咧
好喇，講返差唔多正式落幕嘅 24/25 球季，科芬拿交出咗啲咩成績？睇返數據，其實都冇乜好講——全季所有賽事加埋，佢只係踢咗大約 14 場波嘅時間。對於一個身價 £70m 嘅主力中堅嚟講，呢個出場率低到笑出聲。
至於點解踢得咁少、最終又搞到提早收咧？當中涉及一段由舊年 12 月腿筋受傷開始，拉鋸咗三個月，最終喺今年 4 月先「焗住」接受手術嘅「自討苦吃」故事。詳細嘅來龍去脈、點解話佢可能冇聽足醫療團隊建議、當中嘅決策過程等等，我喺早前 【車迷觀點】科芬拿又又又收咧 文員部總經理自討苦吃 呢篇文章已經詳細拆解過，有興趣深入了解嘅朋友可以搵返嚟睇下，喺度就唔再贅述。總之，結果就係浪費咗寶貴時間，換嚟又一個報銷嘅賽季。
喺佢今季有限嘅上陣時間入面，雖然睇數據佢嘅盤球推進能力依然亮眼 (Progressive Carries 數據喺英超中堅排前列），但同時有啲數據亦響起警號，例如佢嘅犯規同攞黃牌比率就明顯比 22/23 球季高咗好多（Fouls Committed / Yellow Cards per 90），似乎傷患復出之後，踢法上或者心理上都未回復到最佳狀態，有啲急躁。不過講真，踢得咁少，數據嘅參考價值亦有限，最大問題始終係佢根本冇辦法持續上陣。
£70m 代價嘅「玻璃人」與 天價學費
科芬拿嘅「玻璃」屬性，唔單止體現喺佢加盟車仔後嘅恐怖傷病紀錄（近三年缺陣逾 110 場 ），更令人 R 頭嘅係，呢個問題其實早有前科。唔好唔記得，佢加盟前喺李城已經試過斷腳重創，抖咗大半個賽季。
咁點解當年球會仲要扑鎚用 £70m 天價去簽佢？或者可以咁睇：當時（2022 年夏天）正值新老闆啱啱入主，雄心壯志，可能亦帶點「初生之犢」嘅銳氣，面對科芬拿明顯嘅傷患風險，依然選擇咗呢場豪賭。係咪當時低估咗當中嘅風險？定係高估咗自己短期內改造球隊醫療體系嘅能力？呢點冇人知。
結果就係，科芬拿嘅加盟，不幸地撞正咗球會傷病潮大爆發嘅黑暗時期。尤其係 22/23 球季，我哋隊內傷兵滿營，總缺陣日數同比賽場數「冠絕」英超，唔單止科芬拿一個長期養傷，好多主力球員都輪住入廠，情況慘不忍睹。
呢場嚴重而且備受批評嘅傷病危機，最終迫使管理層不得不「痛定思痛」，對被詬病已久嘅醫療部門進行咗一番刮骨療毒式嘅大手術同架構重組（詳細過程可參考我之前篇醫療改革舊文）。可以話，球會係交咗極高昂嘅「學費」，先換嚟今日可能相對穩定同專業嘅醫療支援體系。
或者，正正因為交咗咁貴嘅學費、經歷過咁慘痛嘅教訓，球會高層而家對於科芬拿呢位「歷史遺留問題」——一個極度昂貴、象徵住當初可能過於冒進嘅投資、而且被證明極唔可靠嘅資產——嘅耐性，似乎已經消耗得七七八八。呢個可能就係點解近期會傳出球會對佢持「開放態度」嘅原因。
始終，£70m 嘅轉會費，加埋份據聞週薪接近 £200k 嘅七年長約，喺 FFP/PSR 壓力之下，對一個長期無法作出貢獻嘅球員嚟講，點計都係一筆需要認真處理嘅沉重負債。
潛力 對 現實：曇花一現嘅希望
講到科芬拿係「文員部總經理」、係「玻璃人」、係球會嘅沉重負擔，點解我哋仲會覺得「可惜」？原因好簡單：因為佢健康嗰陣，真係有啲料到，完全展現咗點解當初值 £70m。
好多球迷可能仲記得 22/23 球季中後段，佢短暫傷癒復出嗰一兩個月。當時無論係領隊樸達定林伯，都對佢讚不絕口，話佢身體質素極佳、速度飛快可以覆蓋後防大片空間、而且防守侵略性強，可以令成條防線放心壓前（就好似佢前領隊羅渣士講嘅「向前防守」概念）。當時嘅數據亦都支持呢種講法，顯示有佢喺陣上，球隊嘅平均防守位置確實係推前咗唔少。
更加難得嘅係，佢唔單止防守硬朗，用波亦非常自信。特別係佢由後場引球推進嘅能力，當時有數據顯示，佢嘅帶波距離同成功突破對手嘅次數，喺英超所有球員入面都係名列前茅，呢種由中堅發動嘅衝擊力，可以為球隊進攻帶來額外嘅維度。甚至乎，當時球隊有佢正選上陣，勝率都確實係明顯高咗一截 。
呢啲曇花一現嘅高光時刻、亮眼數據同埋展示出嘅巨大潛力，正正解釋咗點解當初球會肯為佢一擲千金，亦解釋咗點解球迷對佢總係抱有一絲期望。
但係呢啲「昔日光輝」同美好願景，對比返佢加盟後接近三年、超過 650 日嘅總傷病紀錄，就好似毒撚對女神嘅幻想一樣咁虛幻。每次當大家以為佢終於可以擺脫傷患、兌現潛力、成為後防核心嗰陣，好快就會迎嚟下一次受傷、下一次倒下、下一次嘅長期缺陣。
呢種由「極度期望」到「極度失望」嘅不斷循環，反覆折磨住球迷嘅心態，亦正正係我哋對佢「可惜又可恨」的地方——可惜佢嘅天賦才能，可恨佢嘅對腳總係唔爭氣——嘅情感根源。講到底，職業足球好現實，正如一句老生常談：「最好嘅能力，就係能夠持續上陣比賽嘅能力 (The best ability is availability)」。科芬拿無疑擁有頂級中堅嘅潛質，但長期上唔到陣，一切潛質都只係紙上談兵，冇辦法轉化為實際貢獻。
馬賽招手：迪沙比想執雞定車仔止蝕？
講返單轉會傳聞。有報導話法甲嘅馬賽對科芬拿表示咗「強烈興趣」，而帶隊嘅仲要係出名識用波、戰術要求高嘅前白禮頓領隊迪沙比 (De Zerbi)。呢個配搭就幾有趣，或者迪沙比睇中嘅，正正就係科芬拿健康時所展現出嚟嗰種現代中堅嘅特質——尤其係由後場引球推進、參與組織嘅能力？定係迪沙比藝高人膽大，覺得自己有信心或者有特別方法可以管理好呢位出名嘅「玻璃人」？
不過，更現實啲去諗，考慮到科芬拿驚人嘅傷患紀錄同埋極高嘅人工，馬賽或者其他有興趣嘅球會，好大機會只係想試下水溫，睇下有冇機會用相對低嘅成本去「執雞」，例如提出一份先租借、附帶非強制性買斷條款嘅報價。始終喺今時今日 FFP/PSR 嘅環境下，好難想像會有球會肯冒住巨大風險，用高價去買斷一個長期病患。
至於車仔方面，點解會傳出對放走科芬拿持「開放態度」？經歷咗接近三年反反覆覆嘅失望、交咗咁多「學費」之後，球會管理層可能終於覺得係時候要考慮「止蝕離場」。將科芬拿移出球隊名單，最直接嘅好處當然係可以慳返筆天文數字嘅人工（對 FFP/PSR 絕對係正面影響），仲可以騰出一個寶貴嘅非本土球員名額同薪資空間，俾啲更可靠、更能持續貢獻嘅球員。最重要嘅係，可以結束嗰種「唔知佢幾時傷、傷幾耐、點樣圍繞佢做長期規劃」嘅尷尬困局。
當然，肯考慮放人是一回事，實際上點樣操作又係另一回事。以佢嘅情況，要直接賣斷收返合理價錢恐怕難過登天，更可能嘅劇本或者又係外借——將佢借出去，一嚟希望佢喺壓力冇咁大嘅環境下可以踢返起、證明自己嘅健康，二嚟亦可以暫時減輕球會嘅薪資負擔，睇下之後有冇轉機。
作為球迷，見到一個曾經被寄予厚望、天賦肉眼可見嘅球員，可能就咁黯然離隊收場，情感上梗係複雜少少，點都會有啲唏噓同可惜。但理性啲諗，三年喇大佬，無論係球會定係球迷，對佢嘅耐性似乎都已經磨滅得七七八八。「長痛不如短痛」，如果放走佢真係可以令球隊嘅資源運用得更有效率、未來嘅組軍方向可以更加穩健可靠，或者，呢個就係最務實、甚至係對大家都好（可能啦）嘅艱難選擇。
總結：可惜還可惜，向前看或者係唯一選擇
科芬拿喺車路士嘅故事，至今充滿著可惜同如果——如果佢冇咁易傷？如果當初冇揀錯治療方案？如果我地簽嘅係雲迪克… 但現實世界冇如果。雖然佢健康時展現嘅潛力確實令人驚艷，但殘酷嘅現實就係，佢加盟接近三年，大部分時間都係同傷病為伴，成為球隊長期而且沉重嘅負擔。
無論今次馬賽嘅傳聞最終係點，喺度，或者只能夠祝福科芬拿未來能夠奇蹟地徹底擺脫傷患困擾，搵返自己嘅足球生涯。但對車路士球會嚟講，面對現實，也許真係時候要考慮放下呢段充滿遺憾、付出沉重代價嘅關係，將目光同資源投向更可靠嘅未來，向前看了。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
請按此登錄後留言。未成為會員? 立即註冊