曼城來港回顧 |一九年藍鳥大戰藍月亮

hk_cultural 於 30/03/2022 發表 收藏文章
《 外隊來港回顧 |一九年藍鳥大戰藍月亮 》

數數手指,對上一次有外隊訪港,原來已經係兩年半前,曼城喺暑假出訪亞洲來港。當時除左係藍月亮球迷可遇不可求嘅追星機會,適逢當時香港嘅政治氛圍,呢隊強隊來港更加係比多一個渠道香港球迷,向各國傳媒表達訴求同分享政見。

"曼城教練哥迪奧拿向金東進祝福其退役生涯"

先講場比賽,當日比賽除左有雙方球員對陣,更加有為當時傑志亞援,現任傑志主教練金東進舉行職業生涯告別儀式,由哥迪奧拿親自送上球衣祝福呢位前南韓國家隊球員,再由現時效力南通支雲嘅本地球員李毅凱換入。 雙方喺實力有一定差距下,曼城球員憑住出色嘅入攝以及單對單技術,全場六次打破傑志大門。但值得一提係85分鐘,傑志憑住當時新加盟嘅前鋒洛迪古斯,喺中場位置以一下長傳,交比左翼蘇沙進行反擊,蘇沙成功落底傳中,由閘位球員羅梓駿後上射入,為傑志取得一個入球。

"本土球員羅梓駿成功射破曼城門將巴禾後慶祝"

賽前已經有球迷號召喺21分鐘唱出《Do You Hear the People Sing》以表達訴求,比賽期間除左有球迷呼叫口號以及高舉標語,更有球迷跑去中圈大叫「Free Hong Kong」作出號召,喺足球同政治密不可分嘅狀況下表達訴求。


利申呢場係筆者第一次喺香港入場睇傑志比賽,當時好深刻係沿路行上大球場嘅時候,有班曼城球迷向一個路過嘅傑志球迷倒噓。其實撐得本地波都知,一隊本地球隊,喺香港好難夠一隊外隊多球迷支持,但我地呢班撐本地波嘅小小球迷,可以一步一步將本地波個種風味,慢慢傳出去。喺呢個咁艱難嘅時期,用自己手段撐住本地波。或許終有一日喺香港,藍鳥都可以飛得高過藍月亮,香港人排隊嘅浪潮都可以捲往港超比賽日嘅售票處。

(利申當時著曼城波衫入場,但宜家屋企傑志波衫多過曼城 笑)

曼聯本有機會今夏再次來港 左:當時曼聯球員韋碧克 右:傑志左閘丹尼簡斯拿

而其實每次有外隊來港,定必令香港球迷最為興奮,而作爲其中一隊最受香港人歡迎嘅球隊曼聯,其實原本有機會於今個夏天來港,但鑒於香港政府對防疫政策嘅堅持,到最後未能成事,想必令到球迷大爲不滿。

如果你鍾意我地所寫嘅方向,可以去instagram同facebook follow我地!我地除左有講關於足球嘅文章,都會有對本土音樂作出介紹,將好嘅故事傳出去。

loading
loading


-----------------------------------------------
Instagram:@hk_cultural
Facebook: 港式本土

文: Makdiklong 圖片來源: kitchee_official

-----------------------------------------------

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→