從熱身賽睇坦克會如何帶領曼聯及來季展望

Hea談曼聯 於 04/08/2022 發表 收藏文章
上季曼聯經歷慘痛既一季,最後以第六名完成。曼聯今季請左前阿積士領隊坦克領軍,並大手改革整個內部架構,再購入中場艾歷臣、中堅馬天尼斯、左閘馬拉西亞,外借左甸軒達臣,亦自由身走左連加特、普巴、馬達等人,睇黎好有決心大改革去復興曼聯。曼聯備戰開季,以三勝二和一負完成,成績上睇唔係特別出色,但場上球員踢出黎既精神面貌同戰術都明顯同上季完全不同。當然,要同前列兩球隊去爭冠仍有一段距離。先講下從熱身賽同球隊陣容睇下坦克既方向。

門將篇
隊中只得兩名一隊門將迪基亞同希頓,毫無懸念下,迪基亞係正選門將,希頓為副負責出戰盃仔,相信會提升一名青年軍上黎做三號門將以備不時之需。

後防篇
後防將會以四人防線為主。右閘正選會係達洛治,雲比沙加會係副。八爪手既進攻力實在冇大進步下,呢個位置係有需要買人去迎合坦克既戰術要求,小弟認為修咸頓既獲加比達斯可以幫到手。左閘會係馬拉西亞同梳爾之爭,進攻侵略性馬拉西亞比梳爾強,相信會係坦克杯茶,但礙於英超並不易踢,相信開季會係梳爾踢先,等馬拉西亞先適應再慢慢擔正。中堅位置競爭非常激烈,麥佳亞仍然係隊長,佢會係必然正選。從熱身賽黎睇,佢改踢右中堅後,表現同狀態都有明顯回勇跡象,希望一雪上季之恥。佢既拍擋應會係華拉尼或連迪路夫之爭。從熱身賽幾場睇,冰人既狀態比華拉尼好,季初或會先任正選。拜利狀態都不俗,但唔知點解始終都冇領隊肯起用佢,佢應該都會係第五中堅選擇,因為新丁馬天尼斯亦會佔一席位。馬天尼斯既用波能力,回身追波速度應該係五人中最好,但175cm身高係英超踢中堅會係一個幾大既難題。小弟預測當對弱隊要加強後場做波能力就會出佢,對強隊或者對方主踢高Q大棍既球隊就會出任防中掃蕩。最後,泰利斯則睇下有冇其他球隊要,冇就會留低做奧沙2.0,幫手踢下中堅左閘同防中位啦。

中場篇
中場變動非常大,坦克應會續用倒三角既企位。逗後正選防中會係費特,麥湯文尼同加拿會係替補,後生仔沙華治就要靜候機會啦。一對8號位球員,左中場中必然係般奴費南迪斯,而右中場中會由艾歷臣、麥湯文尼同雲迪碧克競爭。艾歷臣既個人能力都比其餘兩人好,相信都會穩佔一席位;雲迪碧克則令人比較失望,跟番舊主帥,踢番舊位置舊戰術,但發揮依據未如理想。麥湯文尼則已到頂,仍可做一個戰術球員,需要防守就出佢去掃蕩保持勝果。最後就睇下迪莊會唔會加盟啦,如果會就由佢去取代費特打逗後防中,到時可能麥湯文尼甚至雲迪碧克都有機會離隊啦。後生仔施丹就睇下會唔會繼續外借,還是留隊跟操慢慢上位。

前鋒篇
前線既變動相對較少,左翼華舒福回歸正選,伊蘭加同加拿曹有力挑戰佢既正選。特別係加拿曹,此子技術膽色兼備,睇好佢上位。右翼正選則會係辛祖。佢呢幾場波既表現都不俗,早早已上力,不過近排又病左,期待佢今季表現。格連活仍未能歸隊,伊蘭加又會係右翼既替補。前鋒認真頭痛,究竟會用C朗定係馬仔?相信坦克係唔會被C朗拑制到,正選將會係馬斯亞。馬斯亞一改近幾季唔跑動既缺點,熱身賽更有一次搶波再單騎入波。熱身賽入3球,絕對能用表現說服坦克俾個正選佢踢。C朗只係最後一場熱身賽踢左頭半場,表現乏善足陳,而佢踢呢半場,球隊既前場逼搶明顯同馬仔踢係有分別。當然呢場其他球員都係後備為主,未必能作準,但迪亞路只出場3分鐘就靠前場逼搶成功再執雞入波,有少少打面。睇黎大師兄係曼聯既日子都唔多長久,睇下佢既心態能否調節,改以後備出場搏盡為球隊作出貢獻,而迪亞路應會係第三前鋒選擇,柏利斯查則可以繼續外借生涯。年青人漢尼拔、梳泰爾都未必會有太多時間上陣,外借對雙方都係較好選擇。

總結
睇左幾場熱身賽,坦克大多以4-3-3為進攻主要陣式,如麥費在場,會用4-2-3-1去防守,又或會用4-3-3倒三角防守,以前場高位逼搶為主。球員係個腦筋上係有明顯進步,前場球員多走防守球員既身後空間進攻。兩個8號位球員前插做拉扯,前鋒墮後幫手駁腳轉方向攻弱邊,翼鋒放膽單對單突破,或踢斜線等前鋒係禁區內回波俾後上既隊友。逗後防中控制節奏,做第一層掃蕩。左右閘壓上提供闊度,中堅都要持球由後場發起進攻。如果買到迪莊,個人認為第四名完成係穩陣;如果買唔到,則只能以追逐第四名為目標,頭六應該無問題既。期待今季坦克帶領曼聯踢出火黎,冇成績都唔太重要,起碼見到有隊型有form。重建係要時間既,曼迷最緊要繼續支持!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 曼聯  英超  熱身賽  坦克  

留言


請按此登錄後留言。未成為會員? 立即註冊
    快捷鍵:←
    快捷鍵:→