咁既部署點會唔輸(賽後分析-曼城對曼聯)

Hea談曼聯 於 07/03/2022 發表 收藏文章
哥迪奧拿排出4-3-3陣式。艾達臣出任龍門。防線由左至右係簡些路-拿撲迪-史東斯-獲加。中場線左至右係貝拿度施華-洛迪-迪布尼。左右翼係馬列斯格利殊支援假九中鋒科頓。

蘭歷克排出4-4-2陣式。龍門係迪基亞。防線由左至右係泰利斯-麥佳亞-連迪路夫-雲比沙加。中場線由左至右係辛祖-費特-麥湯文尼-伊蘭加。前線由般奴費南迪斯拍普巴。

睇數據就知你既部署同冇係冇分別
先睇曼城對上兩場聯賽既場上數據。曼城對熱刺係20射4中,控球有72%,熱刺係同你放棄控球塞係後面打反擊,最後仲絕殺3比2;曼城對愛華頓係12射8中,控球率有67%,而愛華頓都有6射2中,更有問題手球而僅輸一比零,愛華頓則選擇用中低位防守。睇下今場數據,曼城係有70%控球,仲要23射10中目標入4球。拖肥話我壓出黎踢都係俾人射12腳,熱刺塞係後面俾人圍住射而射得多好正常,咁你蘭sir係咩部署可以俾人狂射仲要接近一半都中龍?

自尋死路既4-4-2陣式
唔出C朗其實係明智既選擇,要打反擊就要鬥快同跑得既人,學熱刺咁踢就合河車。不論干地起用5-4-1還是林伯特起用4-5-1,都係務求壓縮空間,將half space區域鎖死,唔俾曼城一眾攻擊中場係呢個位發動進攻,但曼聯偏偏反其道而行,大放呢個位置俾人任攻。整隊先係中低位佈防,普巴同般奴係中線前遮線,兩翼內收中路阻塞曼城後防能直線打穿中場線。呢著係冇乜問題,但之後就出事。當曼城球員係邊路回傳,整隊曼聯選擇向前逼就瀨晒野。曼城連龍門都有咁強既用波能力,加埋一對中堅3個猜你前場兩個。中場3人組又可以overload你費特同麥湯文尼,加上曼城前場三人唔回後幫波,就令到你兩隻閘都唔敢壓上一齊逼。中前場同後場斷開兩截。只要一打穿中場線,曼城前場就可以從容面對面直接進攻曼聯防線。由使用兩名前鋒係前面遮,放棄一名中場球員已經係敗筆。一逼搶已經死左一半,另外果半就死係half-space。當曼城成功傳送到曼聯三閘線時,簡些路拉闊,格利殊內切,貝拿度施華後上,今場曼城強打左路,經常見到3個球員進攻曼聯閘位,伊蘭加有回後,麥湯有過黎補位時,佢地就經洛迪轉方向,再唔係就科頓加入再overload。又或者回傳等伊蘭加向前逼,再打番落閘位度。麥湯文尼難以兼顧half-space同中路位置。曼城淨係打你呢個位都可以打死你。參考熱刺選擇用多一個中堅去塞呢個位,中場就可以擺4個人;愛華頓選擇用多1名中場去塞呢個位,後防就可以擺4個人。你蘭sir竟然抽起一個中後場去擺大個前場,呢個決定咪死囉!

曼城第一下射門就入波
曼城5分鐘已經先開紀錄,一個入波就見到曼聯條防線何其鬆散。貝拿度施華係左面拎左波,邊線仲有格利殊,曼聯有雲比沙加同麥湯文尼形成二打二。當施華仔傳俾格利殊就向前走。雲比同麥湯明顯係防守溝通有誤會。本身雲比就守緊格利殊,只要麥湯跟番施華仔就唔會出事,但麥湯選擇向前逼格利殊,形成2個守1個。格利殊一見到即刻加速再傳俾冇人守既施華仔。連迪路夫本身看管緊科頓,見狀就走出去守施華仔。係呢一刻曼聯條防線已經散左,禁區內既麥佳亞同泰利斯要一對一防守科頓同迪布尼。施華仔一推前左腳就地波傳中,迪布尼後上左腳撞射得手,領先一比零。整個攻勢非常簡單,但曼聯防線缺乏溝通又或者係戰術要求,麥湯一埋去逼格利殊就已經出事。雲比沙加單防能力咁強,根本唔需要去夾擊格利殊。一要中堅移出去補位,你又點要求另一個中堅可以填補咁大個窿!

唔駛廿分鐘追平 燃起一絲希望
曼城入完波後都冇同你搶攻,知你會向前逼就等你逼上黎有空間先再入。係失波前迪布尼都有一下窄位射門被救出。踢到22分鐘,雲比沙加成功攔截係右路chip俾回後現身既伊蘭加。佢第一時間回後俾般奴再質個直線俾最前既支點普巴。普巴係中場線轉到身黎個大轉向搵到左面跑緊100米既辛祖。般奴係後面走overlap幫辛祖拉開獲加,佢就cup大位避開洛迪右腳curve遠柱網仔入。成個反擊非常流暢,除左支點普巴靚轉向要讚外,般奴不惜氣力走overlap亦要讚,最後當然要讚辛祖,係適當時間扣大位再射。一比一就由頭黎過。

半場都係頂唔住
踢到27分鐘,伊蘭加係右面想斬俾前面走位既般奴,但個波唔夠高就俾簡些路頂番轉頭。格利殊頭鎚批俾科頓,佢衝前向高一了就避開左出黎攔截既連迪路夫,順勢壓入禁區右腳施射。可惜再次被迪基亞救出。施華仔衝前再射又被麥佳亞同泰利斯用腳連環擋出,個波去到6碼點迪布尼腳下,佢控定再射又入,再次領先。值得留意既係由個波彈番轉頭,麥湯文尼同費特都係選擇企係度或者散步式回防,而迪布尼、施華仔都冇睇住科頓表演而係一路跟進,所以到科頓射門被擋出,門前係有成4個藍衫球員,而紅衫連埋門將先得4個。連迪路夫呢下咁樣俾科頓過左都要負非常大責任。

半場統計都仲見得下人
戰情又變番膠著,曼城就圍住黎攻,曼聯就死頂駁反擊。完半場前都有一下黃金機會,可惜辛祖係12碼點附近射左個藍天射球。曼城亦有馬列斯既射門被救出。迪基亞認真忙碌。曼城半場10射5中,曼聯都有5射2中。有迪基亞係後面頂住,前面如果偷到雞都仲有價講,但防守問題之大就要蘭sir係更衣室攪攪。

都係要變,但純位換位作用不大
下半場未見蘭sir係踢法有多大改變,都係會嘗試向前逼搶,但多數冇乜意義,好輕鬆就俾對面猜番出黎,再被人利用前場空間進攻。踢到64分鐘,蘭sir首先換人。華舒福同連加特入替伊蘭加同普巴。福仔出到黎踢箭頭位置,連加特則踢右路,兩個調動都係想加強反擊速度,陣式繼續不變。呢場波普巴既作用相對明顯,靠佢利用身型係前點作停球點解除後防被逼搶既壓力,又係組織進攻時做支點做一幅牆支援隊友,可能真係體力問題掛,否則換般奴效果可能更好。可惜既係,4分鐘後馬列斯接應角球射成3比1,就已經將場波終結左。角球老問題,又係冇安排人防守禁區外既位置。上次就話個新教練唔係教進攻所以唔識入波,呢次就唔知點兜啦!

又一場大敗,乜一x樣
去到三比一就變左曼城練波時間。首循環既猜馬嬲畫面再次重現曼徹斯特市。曼聯球員體能都有一定程度既下降,但鬥心可以話係已經見唔到。曼聯繼續漫無目的既逼搶,曼城打穿去到中場又唔同你攻繼續猜。曼城80分鐘換走埋疑似有傷既迪布尼。踢到補時階段,馬列斯接應根度簡直線,突破越位射成4:1埋齋完場。

總結
蘭sir既部署可以話係完敗,對曼城想用4人中場就可以搶贏個中場,會唔會太大想頭啊!踢雙箭頭但兩個都缺乏速度,就令到曼城中堅可以更放膽壓前。唔知C朗真傷定假傷,你咁夠膽唔用佢而咁樣輸法,就一定俾新聞佬有排寫。蘭sir係咪已經疊埋心水下季上神枱?曼聯重建之路相當遙遠,三年又三年,睇下下季邊個帶又睇下下季仲有咩球員係度先再講幾時有錦標吧!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 曼聯  曼城  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→