Saelemaekers 留喺AC米蘭對大家有冇好處？ 精選

Saelemaekers ，呢位22歲嘅比利時年輕人已經喺米蘭踢咗接近3季。當初喺安德烈治買佢返嚟淨係用咗500萬歐元，總對唔係咩大數目，如今佢嘅身價已經上升咗近4倍，可見潛力之大。但Saelemaekers 留喺米蘭真係一個好選擇？

==技術細膩
Saelemaekers 腳下功夫非常了得，速度唔錯，傳球質素中上，喺安德烈治時期基本上會喺中前場任何位置出現，擅長用高速突破撕開對手防線。嚟到意甲，防守球員級數高咗，但仍然無阻Saelemaekers 插花，由邊線扭入中路再傳，間唔中亦會見到佢喺對方禁區一扭四，然後射出界。
==進攻觸角平平
Saelemaekers 確實喺一個腳下技術非常細膩嘅球員，個人認為好有Seedorf影子。佢喺AC米蘭長期出任 4231嘅 右翼位置(有時左翼)，作為右腳仔，佢偏向喺邊路突破再橫傳，而非cut大位射門。Saelemaekers 作為一個翼鋒，表面數據確實平庸，例如20/21賽季，36場聯賽有2入球4助攻，效率唔算高。

Saelemaekers 雖則喺米蘭打翼鋒，但其實佢嘅技術特性更適合打翼衛。

==佢真係一個前鋒？
Saelemaekers 技術好，速度快，但缺乏進攻觸角。佢嘅站位比較後而且比較貼邊線，喺對手嚴密防守下佢只可以扭入中路造波(可能佢慣咗喺安德烈治左中右周圍走)，而且佢非常樂意退落右閘補位，導致佢相對少時間會出現喺進攻位置。佢喺比甲嘅高速突破，嚟到意甲只有打反擊時先會出現。呢種勤力防守同造波嘅突性，相對令佢疏於進攻。
==射術飄忽
Saelemaekers 作為右腳仔，右腳射門能力算唔錯，但只限於控定個波嗰陣，第一時間射門可以話係災難級。

==比利時國家隊
Saelemaekers 喺國家隊主要踢 343 嘅右翼衛，表現相對地出色，喺右路靈活嘅盤扭同衝刺為對手帶嚟唔少麻煩，而且防守穩健，完美展現出潛力 (5場入1球1助攻)

==一成不變 4231
自從米蘭主帥Pioli採用4231後，基本上就無轉過陣式，所以Saelemaekers 就被固定喺右翼鋒位置上 (偶爾擔任右閘或左翼，佢踼左翼時貫徹扭入中路嘅踢法，反而多咗射門同進攻機會)，其他位置已經滿人，最近嘅正選位置甚至被進攻更強嘅Messia Jr 取替，但似乎右翼仍然係佢喺米蘭嘅唯一位置。
雖則佢嘅上陣時間絕對唔少，但一個年輕球員需要適當嘅打法釋放潛力，繼續成長。作為翼鋒，Saelemaekers防守勤奮但欠缺進攻力度，作為右閘，佢嘅單對單能力又未到頂級。翼衛似乎係Saelemaekers 嘅最佳位置。喺米蘭嘅 4231 方針下，Saelemaekers 留喺米蘭會唔會因為位置欠佳浪費咗光陰？米蘭又係咪需要呢種功能嘅球員？