鎚仔的夏季Checklist(球員篇 I - 強幹弱枝的後防)

鎚仔幫主場 於 05/06/2015 發表 收藏文章
在了解標題前,請先睇睇鎚仔後防人手:

門將:阿祖安(Adrian),蘭度夫(Darren Randolph)

左閘:基士維(Aaron Cresswell)

右閘:祖爾奧拜恩(Joey O'Brien)

中堅:雲斯頓列特(Winston Reid),占士哥連斯(James Tomkins),湯堅斯(James Tomkins),列斯布基(Reece Burke),當尼爾亨利(Doneil Henry)

已離隊的後防球員:積斯基達倫(Jussi Jasskelainen) [不獲續約],迪美(Guy Demel) [不獲續約],贊堅臣(Carl Jenkinson) [外借歸回阿仙奴]

新加盟球員:蘭度夫(Darren Randolph) [從伯明翰(Birmingham City)免費加盟]


由此可見,少閘 (弱枝) 多強中堅 (強幹)。小編絕對唔係標題黨......接下來先談門將。


門將:

首先,蘭度夫簡介:


蘭度夫在查爾頓(Charlton Atheltic)開始職業生涯,在2004年正式簽下職業合約。在2004至2008年間曾外借到低組別球會或蘇格蘭球會 [小編按:當時的查爾頓開始一蹶不振,由英超降班到英甲......]。在2010年決定出走到蘇格蘭球會馬瑟韋爾(Motherwell),效力至2013年回歸英格蘭加盟伯明翰,今年夏天正式加盟韋斯咸。值得一提的是,沒有球會為他付過任何轉會費。
「平野無好?」。錯了,上年蘭度夫於伯明翰打左45場聯賽,幫助球取得12場Clean Sheets。絕對有力挑戰阿祖安既正選地位。

然而,阿祖安雖不乏追求者,但現在離隊的機會仍偏低 (連每日郵報,每日星報,每日鏡報都未寫故仔就知咩事)。門將呢個位,最好不變應萬變;就算真係離隊他投,提拔青年軍門將理應足夠留級。

中堅:

雲斯頓列特同兩個占士的中堅位很成功咁支撐鎚仔既防線。季尾亦開始起用列斯布基呢個後生仔,相信來季亦可以繼續依賴佢地。除此之外,唔少後生仔都等住上位,如:當尼爾亨利及16歲既Reece Oxford。呢個Reece Oxford 係英格蘭U17國家隊隊長,唔少豪門如車路士同曼聯都想簽左佢。
Reece Oxford 小圖。

小評:強幹,連小修小補既必要都好似冇......


接下來係杯具既弱枝......
右閘:


贊師傅被阿仙奴收回,經過外借既洗禮,贊堅臣既師傅兩字唔再需要加引號。成條右路既攻防都係靠佢一個(小編按:咁唐寧真係成日走入中間啊嘛),幫到前線唔少。兩個助攻都算係一個證明(小編按:其實算少)。
反觀祖爾奧拜恩,防守的確唔差,但係進攻方面就完全比贊堅臣比下去,而且速度唔高,對住英超眾多快馬難免輸蝕。

數據比較(場均):
攔截:贊堅臣(1.1) < 祖爾奧拜恩(1.4)
解圍:贊堅臣(3.6) < 祖爾奧拜恩(3.7)
堵截傳球:贊堅臣(1.1) > 祖爾奧拜恩(0.8)
傳中:贊堅臣(0.8) > 祖爾奧拜恩(0.6)
關鍵傳球:贊堅臣(0.7) > 祖爾奧拜恩 (0.6)
*來源: whoscored.com

小評:右閘唔夠勁事少,無後備事大......

左閘:

有玩fantasy premier league既你地,應該都擺過基士維入隊。原因不出幾個:
1. 全勤(38場,場場打足)
2. 助攻能力 (2入球,4助攻) [9 clean sheets 是全隊功勞]
問題黎啦!基士維既助攻同入波都集中係聖誕快車前 - 我想講既係兵疲。英超呢種高強度賽事,再加上下年既歐霸參賽資格,很容易造成疲勞 - 而呢個亦係鎚仔「弱枝」既問題。

辛苦你了......

在此,我給鎚仔一點建議吧。


兩閘的建議

要求:
1. 英超經驗
2. 便宜
3. 多功能
原因:基士維本身係一名出色而且可全勤既左閘,鎚仔只需要一名替補,以免兵疲問題導致成績轉差;而祖爾奧拜恩則助攻較弱,長用並非上策。

建議球員:

1. 賴恩泰萊 (Ryan Taylor)


原因:不計兩季腳傷報銷及一季降班,賴恩泰萊還有係韋根同紐卡素既8季英超經驗。此子能勝任兩邊閘及防守中場。雖然腳傷仍斷斷續續未癒,但他的經驗、低薪和自由身既三大優點,這份閘位既保險其實好抵買。

2. 比爾連 (Hector Bellerin) / 贊堅臣 (Carl Jenkinson)


來季阿仙奴在後防無傷無病的情況下,將有四位右閘可用,分別為:比爾連、贊堅臣、哥林張伯斯 (Callum Chambers) 及迪保治 (Mathieu Debuchy)。教授難得地有人滿之患,他很大機會留用較高價購入既哥林張伯斯 (1600萬鎊) 同迪保治 (1200萬鎊) [小編按:參考過往經驗],剩下比爾連 (免費) 及贊堅臣 (100萬鎊) 二揀一來掛牌外借。韋斯咸若送上請求,我認為經濟學家不會拒絕。除此之外,續借贊堅臣的機會較大,因為贊堅臣和比爾連相比更需時磨合,也更需時證明。

3. 格連莊臣 (Glenn Johnson)


格連莊臣為三個選擇中最大機會成為鎚仔既一個。他今季將與利物浦約滿,並希望尋找一個可以比佢正選既球會。能勝任左右兩閘、年資、助攻力加上豐富歐戰經驗,無疑是三個選擇中最佳的一個。唯一既問題係 - GJ所要求既人工是否韋斯咸可提供既呢?

最後,做個總結:球員呢......平有平簽,貴有貴簽,不過最好早d簽:講緊後衛同教練。講完。

仲有仲有,得閒既話唔該like 埋鎚仔幫主場個facebook page:https://www.facebook.com/hammershome?ref=hl

感激不盡,禮拜二再會。

Come On You Irons!! #COYI

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→