香川真司、左翼、10號雜談

筆者先祝大家新一年身體健康地財色兼收。

近幾月,筆者留連於各討論區及Facebook,每當香川唔係做正選或者未能後備出場,就會有好多曼迷 (並可以講係香川迷) 就會問點解唔出佢?點解唔出佢?點解唔出佢? 當然筆者亦曾經喺對車仔後,馬後炮去插莫耶斯點解唔換香川出黎去改變戰況,但筆者亦明白香川既缺點令到佢未能喺英超賽事坐穩正選。
曼聯既翼鋒只有一個人係長期正選,果個人就係出勤次數第3既世界級華西,其次就係莫耶斯愛將贊奴沙,減去長期受傷既蘭尼,最少出場既就係楊格不過人。喺翼無力之下莫耶斯只能依靠自己提拔既贊奴沙作為突破點,但最近幾場波佢都將贊奴沙放喺前鋒身後,其一係利用佢既活力進行壓迫,其二就係贊奴沙防守補位經驗不足。

無論費sir定莫耶斯,佢哋都將香川放喺左翼位置,去到今季香川先多次出任攻中,但好效果多數喺歐冠賽事出現,本土賽事筆者暫時只記得史雲斯既下半場。回顧香川季初不受重用,佢出返黎後既體能補位意識都比上季進步,喺左翼既不濟以及朗尼之下,香川只能夠出任左翼(國家隊亦係左翼),加上贊奴沙既出道無疑再壓縮香川既上陣時間,還好香川英超仍比楊格出數多並且係歐冠正選。

筆者認為香川打左翼既原因在於艾夫華身上,艾夫華本身防守都稱唔上穩陣,顛峰時已經出晒名輕出,只靠疊瓦助攻同長期鐵人坐穩正選,何況身體狀況下跌既佢? 所以上季sir 擺韋球王喺左翼幫助防守,今季莫耶斯亦下令打左翼既要回防協助艾夫華防守,儘管香川身體對抗性差面對壓迫難以hold住個波咁,但香川、贊奴沙、楊格3人之中以香川防守效率最高,咁就解釋到點解莫耶斯咁鐘意喺英超擺香川喺左翼。至於楊格有補位意識但冇防守技巧、贊奴沙意識差但防守技巧較好,筆者都係認為贊奴沙>楊格,始終進攻效率相差十萬九千里。
攻中/10號位置上,新加盟既馬達係最強果個,加上37.1M身價又點會放後備? 香川實力雖然次於馬達卻只係第3或第4選擇,朗尼喺10號位既實力排喺馬達同香川之後,但隊中地位令到佢成為首選或次選,至於贊奴沙於攻中表現不過不失,或者莫耶斯係想比機會佢吸收經驗,畢竟18歲打法同位置都未定位。
朗尼視野開闊但佢既傳波極少從中路去,大多數都係比波去華西去爆;贊奴沙未定位暫時唔講;香川係馬達既弱化版,同2人既走位意識或者能夠擦出花火,筆者曾經寫過史雲斯一戰既香川發揮出色,最大原因在於走位意識、防守位置感好既費查,可見只要有人走岩位,香川就能夠發揮。

馬達香川,走位、短傳、意識都站喺隊中既尖端,楊格華西之流不可比,香川馬達指示華西如何走位,佢哋既前輩貝碧托夫早就做過,證明呢班翼既質素進步少之又少,講返馬達香川,佢哋差別在於視野闊度、長傳能力、身體對抗性以及擺脫能力,亦係呢啲分別令到香川未能成為英超常規正選,好在香川深知自己缺點話會操大隻爭取正選,希望佢講得出做得到。
從眾多評論當中以馬達影響香川之說為最多,但筆者則認為馬達與香川能夠共存,第一係意識上香川馬達有能力擦出火花,雖然香川缺少長傳,但歐冠打攻中既表現已經證明過點樣令到曼聯提升戰力。

打到呢到已經hea 緊又要趕出去拜年,希望有能之士可以喺筆者對馬達香川既觀點上作出詳細分析。

如果喜歡我們的文章,請即分享到︰

標籤: 香川真司  馬達  

留言


請按此登錄後留言。未成為會員? 立即註冊
  • WingHang 於 31/01/2014 評論 NO. 1

    香川同馬達合拍到攻擊線最強

  • 柯南 於 01/02/2014 評論 NO. 2

    我覺得香川踢英超無咁好係關身形同體能問題,佢踢歐聯可以,因為歐聯同佢係多仔時嘅踢法差唔多,再加上無英超咁體力化壓迫,表現就好好多!

快捷鍵:←
快捷鍵:→