重溫雲加既頭五次足總盃冠軍

隨心寫足球 於 01/06/2015 發表 收藏文章
首先恭喜雲加帶領阿仙奴奪得佢地史上第十二個足總盃冠軍,亦係雲加任內既既第六個足總盃冠軍。連埋今屆,雲加曾經帶領阿仙奴七次走到入足總盃既決賽,贏足六個,成績非常標炳,本文將會同大家重溫雲加既頭五次足總盃冠軍,睇下佢係點樣一步一步咁帶領阿仙奴創造歷史,而今季既足總盃冠軍相信大家都印象深刻,畢竟只係尋晚既事,呢度就唔多講喇:

1. 97-98
雲加執教阿仙奴之後既第一次足總盃發生喺1997-98球季,亦係雲加擔任阿仙奴主帥既第二個球季,當年阿仙奴成為左雙冠王,分別贏得聯賽同足總盃冠軍,係球隊自1970-71球季後既首次。

該季阿仙奴奪冠之路可以話係困難重重,當年佢地喺足總盃第三輪面對當年第二級聯賽既維爾港打和0-0,重賽作客又和1-1,最後互射十二碼先以4-3險勝。之後第五輪對水晶宮,同八強對韋斯咸都係要重賽先分得出勝負,於四強小勝狼隊0-1之後,阿仙奴終於走到入決賽。阿仙奴決賽對手係紐卡素,結果阿仙奴憑住奧華馬斯同安歷卡既入球取得冠軍。

2. 01-02
00-01球季既足總盃決賽入面,阿仙奴被利物浦奧雲既兩球末段入波反勝2-1,失卻左足總盃冠軍。不過佢地翌季就重新出發,捧起上季只差一步就拎到既足總盃冠軍,亦喺四年入面再次成為聯賽足總盃既雙冠王。

呢一季既足總盃賽事入面,阿仙奴既晉級之路明顯俐落得多,只出現一次賽和重賽(八強時對紐卡素),而晉級過程中,佢地擊敗過屈福特、基寧咸,以及上季令佢地飲恨既利物浦。阿仙奴於決賽遇上同市宿敵車路士,上半場雙方互交白卷,下半場阿仙奴既中場柏奴亞同龍格堡互入一球,以2-0氣走車路士,而龍格堡亦成為四十年黎首位於連續兩年足總盃決賽都有入波既球員。

3. 02-03
阿仙奴02-03球季於英超以五分不敵曼聯,只能屈居亞軍,但佢地喺足總盃賽場既表現卻能複製上季既英勇,再次贏得冠軍。

阿仙奴該季既晉級之路當中,殺退既對手包括牛津聯、法波路夫、曼聯、重賽後被淘汰既車路士,以及錫菲聯,到決賽迎戰修咸頓。阿仙奴門將施文其中一次最佳撲救—拗腰單手撲救,就係喺當年四強對錫菲聯既賽事中作出。

決賽唯一入球發生喺38分鐘,當時龍格堡起腳被後衛擋出,皮利斯睇準機會控定皮球,補射破網,讓阿仙奴成為自1982年後,第一支成功衛冕足總盃既球會,而上一支就係阿仙奴死敵熱刺。值得一提既係,該場決賽亦係施文最後一次為阿仙奴上陣既比賽。

4. 04-05
同02-03球季一樣,阿仙奴於04-05球季既英超中都只能屈居亞軍,不過冠軍就由曼聯變成車路士。阿仙奴喺淘汰史篤城、狼隊、錫菲聯、保頓同布力般流浪之後,決賽遇上希望衛冕足總盃冠軍既曼聯。

喺120分鐘互無紀錄既情況底下,比賽進入到最殘酷既互射十二碼階段。阿仙奴五輪分別由羅倫、龍格堡、雲佩斯、艾殊利高爾同韋拉操刀,佢地全數射入,但曼聯既史高斯卻喺第二輪射失,當時列文撲出左史高斯射往左下方既皮球。最後阿仙奴贏得佢地第十個足總盃冠軍。

5. 13-14
04-05年球季既足總盃冠軍,原來係惡夢既開始,阿仙奴進入左長達九年既冠軍荒。經過多年既努力同等待,佢地開始從財政問題中走出黎,喺季前,阿仙奴以高價買入奧斯爾,始乎係要話俾世界聽:佢地要重返奪冠行列。果然,佢地再次捧起足總盃,結束錦標荒。

晉級之旅當中,阿仙奴淘汰過唔少強隊,如熱刺、利物浦同愛華頓等。去到四強,佢地遇上韋根,梅迪薩卡於被罰十二碼後將功補過,以頭鎚追平,而法比安斯基於互射十二碼階段中連救兩球,更係直接將韋根踢出局。去到決賽,阿仙奴於頭十分鐘連失兩球,令人以為佢地既錦標荒要踏入第十年,豈料佢地一球一球咁追和,仲要喺加時憑藍斯快射反敗為勝。賽後球隊上下都顯得非常雀躍,大舉慶祝,而雲加亦被球員拋至空中,場面溫馨。

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就睇完呢篇快啲睇下喇,多謝支持~

原文,經編輯


留言


請按此登錄後留言。未成為會員? 立即註冊
  • Won 於 02/06/2015 評論 NO. 1

    好懷念施文

快捷鍵:←
快捷鍵:→