今季四位讓人失望既車路士球員 精選

車路士今季重奪英超冠軍，讓一眾車仔既職球員同球迷都雀躍非常，尤其是係睇到夏薩特既大勇表現，新援迪亞高哥斯達、重返車路士既古爾圖斯又適應到球會踢法，仲有泰利展示咩叫老而彌堅。不過，有高就有低、有喜就有悲，車路士陣中一樣有球員冇以上幾位踢得咁出色，甚至缺乏上陣既機會，讓球迷們感到非常失望。我地睇睇四位今季讓人失望既車路士球員：

1. 拉美利斯
拉美利斯今季受到傷患困擾，以至上半季十九場只係上陣過九場，季尾時更被傳因腎病而要送院治療。另外，拉美利斯亦踢唔番以往高峰時期既表現，以致摩連奴都較常換走佢或先將佢列為後備，今季拉美利斯只有七場英超可以踢足九十分鐘。有人話，拉美利斯既防守唔夠馬迪好、傳球能力唔夠法比加斯好、突破同製造機會又唔夠夏薩特、韋利安同奧斯卡好，所以有一種雞肋既味道。唔知呢位2010年時由賓菲加轉投車路士既巴西中場仲有冇得留低呢？

2. 米基爾
講起上陣機會，效力車路士快將十年既米基爾比拉美利斯更加少，作為防守中場既佢，今季繼續受制於狀態大熱既馬迪，加上下半季又有膝傷休戰六場，使米基爾只係打左十八場英超，當中只得三次踢足全場。表現方面，米基爾喺英超場均成功攔截同截斷傳球，數字上皆遠遠低過馬迪。(分別係0.89:2.81同0.78:2.03) 據聞車路士都唔係太想留人，有消息指車路士希望放米基爾去修咸頓，以換入法國中場舒尼達連。

3. 古亞達度
哥倫比亞人古亞達度於今年一月由費倫天拿轉投車路士，當時車路士不惜放走德國中場舒爾尼，同外借埃及美斯沙拿以騰出位置。呢單交易一完成，球評家們都話係對車路士陣容既一個升級，因為古亞達度能攻能守，可以取代舒爾尼同為韋利安黎緊競爭。最後，古亞達度一樣都做唔到，唯一做到既係令球迷們失望，佢未試過踢足全場，於英超只係交出可憐既一助攻零入球，每場只製造0.5個機會。

4. 菲臘比路爾斯
球迷對菲臘比路爾斯既期望絕對不亞於古亞達度，貴為上屆西甲冠軍馬體會既正選左閘，大家都希望佢可以接替艾殊利高爾離去後既左閘位置，可惜既係，佢賺唔到太多既上陣機會，因為競爭對手艾斯派古達表現英勇。今季菲臘比路爾斯喺英超只上陣過十五場，足足比艾斯派古達少一半，佢多數只可以坐喺後備席睇比賽睇足全場，足以睇到摩連奴對佢仲未有太大信心。其實菲臘比路爾斯喺場均攔截上同艾斯派古達真係不相伯仲，但係截斷傳球同阻擋射門方面都比對方少一半。

原文,經編輯

若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk
大家睇左延伸閱讀既文未？未就睇完呢篇快啲睇下喇，多謝支持~