美斯近年五次通渠回顧 精選

各位讀者，愚人節快樂，今日出文既內容當然要襯一襯愚人節，寫下球員既狼狽一刻。通坑渠對筆者黎講一直都係一對一防守中最大既羞辱，不單止被進攻球員過到之外，仲會搞到自己非常狼狽，出醜當場。美斯有精湛既過人技術就係人都知，原來佢有時都會順便通人坑渠架喎，甚至於防守球員回身回過神來既時候，美斯已經個波送入球網。我地回顧下近年美斯五次通渠：

1. VS 瑞典
2013年既國際友誼賽中，該場踢中場既美斯於反擊時，順勢通左一通回緊防既瑞典中場卡斯唐既坑渠，然後於瑞典既援兵趕到前將球傳俾隊友，卡斯唐對腳其實擘得並唔算大，只可以話美斯落腳推波個時機捉得好準。
http://streamable.com/hci8?t=3.8
2. VS 曼城呢次通渠都相當出名，喺今年歐聯十六強巴塞對曼城既比賽中，美斯嘗試於右路突破，佢引占士米拿過去防守佢，正當占士米拿以為美斯會向前推時，美斯就突然轉向通左占士米拿坑渠，米拿最後仲要失重心跌低，在看台上既巴塞前主帥哥迪奧拿亦為之而驚歎。
http://zippy.gfycat.com/AdoredWildEft.webm
3. VS 皇家馬德里
再為大家送上美斯今季既一下通坑渠，今次表現既機會發生喺西班牙打比—巴塞對皇馬既比賽入面。美斯一樣喺右路組織攻勢，面對住兩人包夾時，美斯巧妙咁將波喺卻奧斯兩腿之間穿過，不過呢次通渠唔算太俐落，因為通完之後蘇亞雷斯要跑過去接應美斯似是而非既傳球。http://streamable.com/h4wc?t=6.0
4. VS 西維爾
於11-12球季巴塞作客對西維爾既比賽中，美斯接應恩尼斯達既傳球，然後突然喺西維爾守將斯巴希治面前轉向，趁斯巴希治仲準備緊防守動作時通佢坑渠，斯巴希治被通渠後回身，發現美斯已經較好左腳，笠射成功，為巴塞擴大領先優勢。
http://streamable.com/d7bk?t=2.6
5. VS 愛斯賓奴
又一球美斯今季所通既坑渠。今季巴塞主場對死敵愛斯賓奴時，美斯接應蘇亞雷斯既傳送，可惜拎得唔好，個波離左身，好彩美斯立刻修正，喺愛斯賓奴球員衝過黎時通佢坑渠，然後再於援兵趕到前快腳用右腳抽入。最後佢於該場上演左帽子戲法。
http://streamable.com/mlh2?t=17.5
若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk
原文,經編輯