五位喺歐洲搵食,而且身高比較矮既現役門將

隨心寫足球 於 26/03/2015 發表 收藏文章
一講到專業守門員,唔知大家會諗起咩呢?未諗到反應快同穩定之前,相信個「高」字已經喺大家腦海中浮現。一個門將生得高既話,俾人既信心都會大啲,人地可能會覺得佢地冇咁容易俾人笠死,又或者橫身飛撲時可以摸遠少少。所以對於一啲身高相對矮既龍門黎講,點樣克服先天限制係佢地既一大難題,佢地同高既門將比較既話,可能要企出少少封多少少位,但對佢地反應既要求亦會相對提高。

以下幾位就係一眾可以克服到先天限制,俾到信心頂級球隊去起用佢地既矮門將。佢地相對一般人當然唔矮啦,但喺國際門將界黎講,佢地的而且確係較矮既一群。入選要求係該門將身高最多只能達1.83米(6呎)。所以一眾貌似不高但超標既門將,如卡斯拿斯(皇馬,1.85m )、拿華斯(皇馬, 1.85m )、巴禾(巴塞, 1.84m)、文丹達(馬賽, 1.85m )等則未能入選。所有身高數據均取自維基百科。

1. 恩桑馬
恩桑馬係本文第一位介紹既門將,身高只有1.83米既佢現在效力於德甲既慕遜加柏。恩桑馬係瑞士班霸巴素利既青訓產品,於2009年2月第一次正式身披巴素利一線隊球衣上陣,並於11-12年正式成為巴素利既正選門將。恩桑馬於巴素利連奪四屆聯賽冠軍後,今季決定加盟慕遜加柏,取代轉投巴塞隆拿既達史迪根。上年暑假瑞士國門比拿里奧宣布從國家隊退役,恩桑馬亦會被提拔為瑞士一號門將。

2. 域陀華迪斯
呢位球員相信筆者都唔使多介紹,身高1.83米既域陀華迪斯自2002年起就喺巴塞隆拿一隊中效力,長年擔任巴塞既正選門將,隨隊贏過唔少錦標,例如六屆西甲冠軍,三個歐聯,真係拎獎拎到手軟,不過佢成日因為佢既蝦碌表現俾球迷恥笑。而域陀華迪斯要等到2010年先迎黎佢國家隊既處子戰:代表西班牙對戰南韓,佢國家隊生涯通常只能擔任卡斯拿斯既後備。上年三月佢十字韌帶斷裂,季後離開巴塞,今季冬天時以自由身加入曼聯。

3. 安耶馬
講起尼日利亞國門安耶馬,未必個個知係邊個,但睇完上圖之後大家都可能有啲印象。大家可能係因為佢於2010世界盃對阿根廷時既精彩表現而認識佢,當時佢左飛右撲,若然唔係佢既話,尼日利亞絕對唔止輸1-0,但係大家又知唔知只得1.82米高既安耶馬自2002年起就係尼日利亞既首號門將呢?佢帶領尼日利亞贏得一屆非洲國家盃。球會層面方面,佢現在效力於法甲球會里爾,不時都有驚人撲救。

4. 奧斯賓拿
哥倫比亞國門奧斯賓拿原先於法甲尼斯搵食,雲加於2014世界盃時睇到奧斯賓拿既穩健表現後,將佢帶去阿仙奴。奧斯賓拿身高只得1.83米,拍埋於阿仙奴前一號門將—1.96米高既施捷斯尼身邊明顯矮一大截,非馬後炮咁講一句,筆者季初已經覺得奧斯賓拿比施捷斯尼更可靠。今季初段時,奧斯賓拿只能於本土盃賽中上陣,但施捷斯尼季中對修咸頓時犯下兩球失誤,令雲加下決心更換隊中一號門將人選,而奧斯賓拿亦不負所託,用表現去換取更多正選機會。
(左一施捷斯尼,右一奧斯賓拿)

5. 比圖
比圖可能係呢張名單中最名不見經傳既球員,但佢卻係筆者最鐘意既現役門將(不論高矮)。佢係呢張名單中最矮既門將,只得1.80米,現在效力西甲西維爾。比圖生涯既一大半都係處於流浪階段,大約十一年間效力過八間球會,於2013年先落戶西維爾,之後佢成功因為原門神柏立既受傷上位。佢帶領西維爾贏得13-14賽季既歐霸盃,當中佢於互射十二碼階段中成功撲出兩球,成為球隊奪冠既一大功臣。國家隊方面,佢係葡萄牙既二號門將,曾經於2014世界盃葡萄牙對美國既比賽中正選上陣。

好文推介:五球精彩既No look pass

好文推介:利物浦爭逐前四的發電機—古天奴

好文推介:英國球場的古與今小測驗,你猜得對嗎?

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk

留言


請按此登錄後留言。未成為會員? 立即註冊
  • KinPo Tsang 於 26/03/2015 評論 NO. 1

    安耶馬個到 打錯 係2014世界盃

  • TheAbsoluteYouth 於 26/03/2015 評論 NO. 2

    尼日利亞同阿根廷於2010同2014世界盃都有對賽架~

  • 基斯坦亨利 於 27/03/2015 評論 NO. 3

    唔過170個個係美斯,唔係卡斯

  • bigmoon 於 27/03/2015 評論 NO. 4

    墨西哥佩雷斯呢?

  • Chung Shek Sum 於 29/03/2015 評論 NO. 5

    咁都矮,笑

快捷鍵:←
快捷鍵:→