經理人:法卡奧響費爵手下一定會更好

隨心寫足球 於 25/01/2015 發表 收藏文章
曾經救人一命既法卡奧今年只係為曼聯射入左三球,對上一次上陣係足總盃對劍橋聯既賽事,但未能取得入波,已經係對上六場比賽入面第五次冇波入喇。


法卡奧既經理人文迪斯無懼激嬲雲高爾既危險,公開表明如果法卡奧係由費格遜帶領既話,表現一定會更好。文迪斯批評雲高爾冇俾太多法卡奧機會去表現自己,並且公開撐法卡奧,話想睇到法卡奧效力既係費格遜,而唔係雲高爾,佢話:「我更加鐘意睇到帶領法卡奧既係費格遜,法卡奧係一個要打足九十分鐘既球員,我唔明點解佢而家唔係打足」,並且批評雲高爾響之前1-0輸俾修咸頓既賽事入面,連後備名單都唔俾法卡奧入。


曼聯如果想響今年暑假將現時暫借既法卡奧永久帶到球會,就要俾4300萬鎊轉會費,但似乎都係唔會出現呢個情況喇,因為上年斷左韌帶既法卡奧響曼聯踢唔返佢以往最頂級既表現。

費格遜響為曼聯工作既四分一個世紀入面,曾經發掘或引入過一大批優秀既前鋒,例如:曉士、簡東拿、安迪高爾、約基、蘇斯克查、雲尼斯達萊、C朗拿度、朗尼同雲佩斯。雖然佢唔成功將前歐洲金靴獎得主科蘭既實力發掘出黎,但科蘭一樣撐費格遜,話法卡奧響費格遜帶領下會獲益更多。

(約基、高爾及費格遜)

科蘭話:「法卡奧選擇放棄摩納哥正選位置而選擇加盟曼聯,黎到一個新環境既佢,好唔好彩遇上一個同佢一樣新黎報到而且要證明自己既領隊,呢樣野係費格遜唔使做既。雖然一個優秀前鋒係唔應該俾4-4-2陣式定3-5-2陣式影響表現,但法卡奧始終都係要同一班新球員去夾,一齊去適應唔止一個新既系統。法卡奧以往不論響河床、法圖、馬體會定摩納哥都係鋒線上既首選,但係而家佢要同老或嫩既前鋒們爭位踢,以致佢五個月踢得十四場波,大約三個星期先踢一次正選,對佢完全係唔夠,其中一個原因係曼聯冇歐洲賽踢,少左比賽數量,唔夠比賽俾唔同球員都有充足上陣機會。」

(科蘭及費格遜)

文迪斯話法卡奧季尾一定會轉去另一間大球會,但唔係皇馬,因為皇馬已經有賓斯馬。
P.S. :文迪斯係世界級經理人,客戶球員及領隊包括:C朗拿度、迪馬利亞、干查奧、蘭尼、卡華奴、哥利斯馬、占士洛迪古斯、迪基亞、域陀華迪斯、摩連奴及史高拉利。
(圖中為文迪斯)

若你鐘意「隨心寫足球」,請like以下專頁:https://www.facebook.com/footballvoicehk

原文,經編輯

如果喜歡我們的文章,請即分享到︰

標籤: 英超  曼聯  法卡奧  

留言


請按此登錄後留言。未成為會員? 立即註冊
    快捷鍵:←
    快捷鍵:→