車路士新目標—你要知道古達度的五件事 精選

英超榜首車路士據報快將完成冬季第一簽，亦可能係唯一一簽，佢地既目標就係現時效力費倫天拿既哥倫比亞國腳古達度。古達度本身係一個高速、有技術、娛樂性高既球員，佢喺呢幾季入面進步神速，響入球同做決定呢兩項能力上都有所提升。雖然佢自2014年世界盃後已受多人熟悉，但係仲有五樣關於佢既野係大家未必知既：

1.佢係前鋒出身

(古達度於費倫天拿出任翼鋒)

車路士主帥摩連奴想簽古達度，可能係因為前者睇中左後者既響邊路上既破壞力，但係其實古達度一開始足球生涯嗰陣係踢前鋒。古達度最初時響哥倫比亞球會Atletico Uraba出身，當時既佢係打一個中鋒既角色，直至球會創辦人 Nelson Gallego 建議佢去打翼，佢先開始喺邊路發展。

而家既古達度可以打唔同位置，例如翼鋒、翼衛、中場中同埋前鋒，似乎車路士準備簽入一名通天老倌。

2.古達度父親喺古達度五歲時被槍殺

(古達度在他第二間球會(Independiente Medellín)中堅強成長)

哥倫比亞有好多事都臭名遠播，街頭暴力就係其中之一。當年古達度既父親係一位貨車司機，響哥倫比亞既Necocli被槍殺，而事件發生時古達度只得五歲。

成長於一個缺乏爸爸既環境底下，對任何一個小朋友黎講都唔容易，因為爸爸往往係佢地生命中第一個英雄人物同榜樣。幸好，古達度無因為早年喪父而變得頹廢，反而變得更堅強，一如古達度母親所親，喪父一事令古達度有所成長。

相信而家古達度既爸爸一定會為自己個仔而自豪。

3.佢細個要先做個好學生先有波踢

(古達度與母親)

古達度細個唔係可以好似而家咁全心全意踢足球。之前古達度母親響哥倫比亞接受訪問時講，佢當年要求古達度承諾要響學校表現優秀，然後先俾古達度踢波。作為一個孝順仔，古達度接受左呢個要求，而佢亦成為唔少小朋友同年青球員既榜樣。

4.佢細個時鐘意氣球同波Boot

(古達度報忠國家，為哥倫比亞披甲)

我地每一個人細個時總會特別鐘意一啲野，可能係朱古力，可能係玩具車，古達度同一般小朋友一樣，都有自己鐘意既野，不過佢鐘意既係氣球同波Boot。據古達度母親所講，古達度細個時非常鐘意氣球，而被問想要咩禮物既時候，古達度會想要波Boot。古達度由一個鐘意足球鞋既小朋友變成一個專業足球員，見到佢成功達成兒時夢想，將興趣轉化為職業。

5.佢入波慶祝動作係向母親致敬


各位讀者睇到呢度，可能都知道古達度同佢媽媽關係深厚，而佢既入波慶祝動作亦證明左呢一點。球迷除左會讚歎佢優秀既球技之外，亦會俾佢搞笑既入波動作吸引，入波之後古達度會作一連串Reggae動作後再做多個心型，以將入球貢獻俾母親。

好多球員入波都會將入波貢獻俾伴侶或子女，但好少人會貢獻俾母親，古達度就係少數之一，希望佢地母子情誼永固！附上古達度慶祝入波片段：
https://www.youtube.com/watch?v=L8lOauNKeWM
如果你想俾多啲支持「隨心寫足球」，請like以下專頁:https://www.facebook.com/footballvoicehk

原文,經編輯