史上轉會費最高既五位門將 精選

最近曼聯引入左阿根廷國門羅美路，擁有世界盃亞軍既羅美路被視為新一季曼聯正選門將位置既有力挑戰者，而曼聯近幾季既正選門將迪基亞就盛傳會被賣至皇家馬德里。皇家馬德里一直都好希望贏得迪基亞呢位未來西班牙國門，若然真係出手投標既話，銀碼一定唔會低。講起門將轉會，價錢一定冇其他位置既轉會費咁高，但係睇睇史上轉會費最高既五位門將都無妨：

5. 迪基亞
排喺第五位既係本文引言中既主角—迪基亞。迪基亞年紀輕輕就喺馬德里體育會打出名堂，吸引到當時曼聯領隊費格遜既注意，最終以1400萬鎊轉到奧脫福。迪基亞二十出頭就要繼承荷蘭傳奇雲達沙既位置，背負唔少旁人既壓力，但迪基亞仍然可以踢出優秀表現，證明曼聯喺佢身上所付既1400萬鎊係物超所值，近兩季佢更加係力挽狂瀾，為曼聯喺英超搶到唔少分數。

4. 費爾
未必個個讀者都聽過費爾呢個名，呢位法國門將職業生涯大部份時間都係喺意甲渡過，輾轉踢過幾間如費倫天拿、熱那亞等球會，而當中由國際米蘭轉會至帕爾馬既轉會則花左帕爾馬1470萬鎊。效力帕爾馬期間，費爾一直都係球隊既主力，直至帕爾馬出現財政問題，費爾先無奈被賣至紫白合費倫天拿。最近兩季費爾效力土超球隊貝沙，而家處於失業狀態。

3. 托度
費爾由國際米蘭轉投帕爾馬既原因主要有二，喺呢段先講一個：就係托度由效力左八季既費倫天拿轉投國際米蘭，令費爾失去地位。托度以1855萬英鎊加盟國際米蘭，喺佢效力既九季當中，佢隨隊贏到唔少錦標，包括五屆意甲、意大利盃及意大利超級盃各三屆，以及喺掛手套前最後一季贏得歐聯。值得一提既係，佢係少數能喺意甲取得入球既門將：佢曾經於門前混戰中撞入皮球，於比賽最後階段協助國際米蘭逼和祖雲達斯。

2. 紐亞
呢位德國國門已經贏盡一切，世界盃、歐聯、德甲既冠軍獎牌一一都可以喺佢既獎牌櫃中搵到。相信好多都知紐亞出身於史浩克04，喺10-11球季既歐聯淘汰賽中，紐亞於主場對曼聯時打出其中一場代表作，左飛右撲下救出大量險球。同一季，佢宣布唔再續約，拜仁慕尼黑亦睇準時機，以2100萬鎊帶走呢位明日之星。起初，部份拜仁球迷並未能接受紐亞既加盟，但紐亞一步步贏得球迷既心，相信而家冇邊個拜仁迷會討厭佢。

1. 保方
費爾由國際米蘭轉投帕爾馬既第二個主要原因就係：帕爾馬提供機會俾費爾取代轉投至祖雲達斯既保方。祖雲達斯從帕爾馬帶走保方足足用左3702萬鎊，而直到今日，認為呢筆錢唔值既球迷應該係寥寥無幾，因為保方已經年屆37歲，但仍然係老而彌堅，狀態穩定。除左歐聯外，一切可以贏既球隊榮譽佢都拎過哂，為祖雲達斯上陣超過四百場意甲既佢亦係意大利國家隊上陣紀錄保持者，場數係148場。

如果大家鐘意隨心寫足球，不妨讚好FB專頁，專頁會定期更新球壇趣聞，讓大家緊貼球壇，謝謝支持！：https://www.facebook.com/footballvoicehk

原文,經編輯