五球精彩既No look pass 精選

不論係普通插花，定係高難度啲既Rabona，只要球員用得精彩同岩時機，相信球迷們都會非常樂意見到佢地使用唔同既腳下技術。其中一門球星常做既技巧，就係No look pass。雖然No look pass冇牛尾巴嗰啲一對一既技巧咁受觀眾注目，但係實用性高之餘亦有觀賞價值，球員們可以透過轉頭去呃到防守球員既回防路線，以致為隊友製造一個更舒服既接波空間。以下落黎我地睇睇球壇上五球精彩既No look pass (呢個世界上實在有太多既精彩No look pass，未能一一盡錄，呢個只列出五個，日後有機會再繼續分享，請各讀者見諒。)：

1. 米高勞特立米高勞特立幾鐘意用No look pass，所以相信唔少前鋒都想同佢合作，一齊去製造金球。當米高勞特立效力巴塞時，佢平時都會用No look pass，其中一位受惠者就係巴西前鋒羅馬里奧。片段中呢球No look pass係發生於米高勞特立代表丹麥對陣尼日利亞既比賽中，當時佢做左一個巧妙既No look lobbing pass俾隊友山特，最後山特當然不負所托，將皮球送入網中，丹麥於該場大勝4-1以回。https://www.youtube.com/watch?v=TF7m3-tpfxE
2. C朗拿度
C朗拿度效力皇家馬德里時，不時都會使出No look pass，當中最瀟灑既例子包括有對陣愛斯賓奴時斜傳俾卡卡，以及代表葡萄牙征戰喀麥隆時第一時間交出既嗰一記傳送。不過呢篇文章想貼出既係C朗拿度於季前熱身賽對洛杉磯銀河時傳出既腳趾尾拉西No look pass，如果莫拉達把握得好啲既話，C朗拿度一早拎左個助攻。
https://www.youtube.com/watch?v=zwaaT7KNwq8
3. 朗拿甸奴
朗拿甸奴鐘意玩No look pass就眾所周知，鑑於佢曾經傳出過太多美妙既No look pass，筆者就為各位讀者搵黎一球近期啲既傳送。朗拿甸奴不久前曾經重返家鄉加盟明尼路，當然亦有做出No look pass，以下呢球佢用作傳中，最後更變為助攻。
https://www.youtube.com/watch?v=GZ3BZEXgNpo
4. 沙比阿朗素
呢球唔係黎自比賽，只係黎自皇家馬德里既操練中，但含金量仍然極高。大部份人都知沙比阿朗素以精準長傳而著名，原來佢玩No look pass一樣了得，片段中既呢球佢唔單止傳到波，仲要通埋球皇施丹坑渠。施丹被通完後都有一絲愕然，絕對係筆者最愛既一球。
https://www.youtube.com/watch?v=bTeMuax4Oi0
5. 亨特
呢位禾夫斯堡既球員，喺轉會前係雲達不來梅既隊長。上季佢有一球非常精彩既No look pass，如片段中所見，佢用腳踭笠傳俾於禁區頂等待機會既隊友。呢球既難度相當高，首先，亨特於接球要先知道隊友既位置，第二，佢腳躁既控制要做得非常好，否則方向同角度皆會出現問題。
https://www.youtube.com/watch?v=nFx3hemGssE
好文推介:利物浦爭逐前四的發電機—古天奴
好文推介:英國球場的古與今小測驗，你猜得對嗎?

若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk

原文,經編輯