五位可能比你印象中更年輕既球員

隨心寫足球 於 02/08/2015 發表 收藏文章
最近前葡萄牙國腳普斯迪加正式加盟印超聯Atlético de Kolkata,令幾近被遺忘既佢再現人前,大家可能會覺得:呢位為葡萄牙國家隊上陣過71次既前鋒要去到印度搵食既話,年紀應該有35-36歲掛?但事實係:原來佢得32歲,令唔少球迷大跌眼鏡。普斯迪加既名字好似出現過好多年咁,但其實並冇想像中咁老,以下係五位可能比你印象中更年輕既球員(唔包括迪亞高哥斯達)。

(23號為普斯迪加,攝於2014世界盃)

1. 杜斯山度士
年少於巴塞隆拿成名既墨西哥人杜斯山度士,由於巴塞人才過剩,唯有轉戰英超,加盟熱刺尋找機會。不幸既係,外闖之路正正係浪人生涯既開始,經過三次外借(葉士域治、加拉塔沙雷、桑坦德),最終都係被賣至馬略卡,其後再於維拉利爾踢過兩年。今季佢正式加盟美職聯既洛杉磯銀河,美職聯被視為國際球星既養老之地,但杜斯山度士現時只得26歲,叫人感到可惜。

2. 菲爾鐘斯
菲爾鐘斯同杜斯山度士唔同,佢唔係經過多年既浪人生涯。現時正效力曼聯既呢位英格蘭國腳外貌比佢23歲既真實年紀成熟些少,而佢加盟曼聯後已經踏入第四季,已經係現時曼聯後防線資歷比較耐既一個,加上有世界盃、歐聯、英超冠軍等經驗,可能會令球迷們覺得佢唔止23歲。

3. 米基爾
米基爾呢個名大家都可能聽左好耐,直覺會覺得呢位效力車路士既尼日利亞中場年齡唔細,但事實上米基爾只得28歲。原來米基爾2006年時已經加盟車路士,隨隊贏盡一切錦標,包括英超、足總盃、聯賽盃同歐聯等,而家佢更加效力車路士時間第二長既球員(第一為隊長泰利),車路士或英超球迷聽足佢個名九季,難怪唔覺原來米基爾只得28歲咁後生。

4. 耶古保
耶古保同杜斯山度士一樣,都係球壇上一位著名既浪人,自2003年加盟樸茨茅夫後,九年間踢過五間英格蘭球會(樸茨茅夫、米杜士堡、愛華頓、李斯特城及布力般流浪)。其後轉投廣州富力,曾經於比賽尾段入球,成功終止廣州恆大34場聯賽主場不敗紀錄。今年2月,耶古保重返英格蘭,加盟雷丁,以入球協助雷丁擊敗打比郡晉級八強,可惜喺季尾被球隊放棄。經過多年旅程,耶古保都只係32歲,比唔少人印象中細得多。

5. 柏圖
柏圖可以話係巴西近代最令人感到可惜既新星,呢位當年被賦予極大期望既前鋒於AC米蘭既頭幾季屢有佳作,例如2011年歐聯對巴塞既入波,完全展示到自己既速度同進攻觸覺。不過之後柏圖受盡傷患拆磨,據聞佢試過一切可行既治療(包括心理治療),都未能重返高峰。於2013年,柏圖被AC米蘭放棄,重返巴甲效力哥迪泰斯,現被借至聖保羅既佢可能已經被球迷忘記,但佢現時只得25歲,仍有可能重返歐洲賽場(現傳韋斯咸同水晶宮都佢有興趣)。

如果大家鐘意隨心寫足球,請讚好FB專頁,專頁會定期更新球壇趣聞,讓大家緊貼球壇,謝謝支持!:https://www.facebook.com/footballvoicehk?fref=ts

原文,經編輯

留言


請按此登錄後留言。未成為會員? 立即註冊
  • vierigoal 於 02/08/2015 評論 NO. 1

    艾迪拜約

  • D Alan Lui 於 02/08/2015 評論 NO. 2

    以為會有和仔

快捷鍵:←
快捷鍵:→