〔歐國盃短評〕一山不能藏二虎 葡萄牙用B費定B華好? 精選

歐國盃衛冕冠軍葡萄牙，今屆比起五年前更加人強馬壯。不過，球隊表現一般，當中包含各種因素，今次小弟希望集中討論關進攻球員方面嘅問題。當般奴費蘭迪斯(般奴/B費)同貝拿度施華(B華)兩位擅於組織嘅球員同時上陣，球隊便出現「攻不銳，守不穩」嘅問題。看來一山不能藏二虎，葡萄牙教練山度士排陣時需要二擇其一，用般奴定B華好？
先比較一下兩人於球會表現良好時嘅位置同工作，以及於國家隊嘅位置同工作，再描述其表現 (數據來自WhoScored)。

般奴:
般奴一加盟曼聯，就即刻成為球隊重心，球隊嘅組織大多由佢引領同梳理。不過，於葡萄牙國家隊，一直以來C朗都係進攻重心。C朗勤於回後引領攻勢之下，球權較多落在C朗當中，般奴未能於擅長嘅工作發揮實力。

般奴於歐國盃表現一般，未有於曼聯嘅作用。數據可以顯示，般奴於歐國盃場均關鍵傳送有1.3次，只有於英超賽場(2.6次)嘅一半。而場均射門只有0.7，遠低過於英超嘅3.3次。場均被侵犯次只有0.3次，遠低過於英超嘅1.4次。可見球權減少之下其進攻威脅嘅落差。
B華:
B華過去一季於曼城主要擔任中路嘅中場中或攻擊中場，主要工作為以靈活走位同技術連接中前場同牽引對手後防球員。於國家隊，B華被安排擔任右翼，其速度不足，令球隊難以於右路突破。

B華於歐國盃表現亦係一般，由於位置同工作不同，B華嘅表現對比會用不同數據。B華三場比賽中未有射門，場均關鍵傳送亦有1.3次，同般奴一樣。而B華於歐國聯場均盤球有 0.7次，相比於英超(1.6次)少近一次。可見佢於邊線嘅威脅有限。

解決方法:
去到國家隊，兩人表現都未及於球會嘅表現。要將兩人嘅長處充分發揮，最緊要係為其分配適合嘅位置同擅長嘅工作。

若要般奴充分發揮長處，就需要C朗讓出更多球權，俾般奴做組織重心。不過般奴長期欠缺休息，顯現疲態，抗衡力下滑，未必能長時間勝任「主角」位置。十六強面對比利時嘅大戰，般奴宜先列後備。
而B華移入中路，可以以靈活走位同技術，連接中前場同牽引對手後防球員，輔助C朗。

C朗為國家隊進攻重心下，B華應該係更適合葡萄牙嘅人選，可以用B華擔任攻中/中場中，般奴先列後備。教練山度士於面對法國嘅比，其實亦有收起般奴，但B華依然擔任右翼。

不過，一支球隊中，戰術方面需要變化，於大部分時間面對密集嘅比賽，亦不妨以般奴成為重心，而C朗留在箭頭位置，集中做支點以及頭頂腳踢嘅埋門工作。

雖然葡萄牙兩位當打球星，表現不似預期，但見到葡萄牙教練山度士對法國時用人方面有所調整，相信般奴同B華，兩位仍有機會交出優良嘅表現，發光發亮。