阿仙奴接近以5000萬鎊簽新晉英人中堅

英超球隊阿仙奴今個夏天有大衛雷斯約滿離隊，呢位巴西老將唔係話表現相當出色，但效力兩年間仍算不過不失，用波作用亦都明顯。佢離開之後，阿仙奴中堅位置上現有人腳可否令人有足夠信心？相信多數阿仙奴球迷嘅答案都係負面，剩低嘅就係期待加盟後仍未代表阿仙奴於正式賽事上陣嘅沙列巴，呢位法國年輕球員今季外借尼斯表現出色，俾機會佢來季證明自己係眾人願望，不過all-in喺佢身上，將佢視為救世主似乎亦不切實際，因此阿仙奴今個轉會窗其中一大目標係已經有一定英超經驗嘅白禮頓中堅賓韋特（Ben White）。

事實上，早前已經有多個可靠消息如Sky Sports報道，阿仙奴正式向白禮頓提交報價，以4000萬英鎊求購賓韋特，但遭到拒絕。不過，阿仙奴並未打算放棄，而係開出更高價錢，希望打動白禮頓放人；同時，賓韋特本人亦都希望加盟阿仙奴，所以轉會費成為唯一阻礙。
根據Sky Sports，以及著名記者David Ornstein最新報道，阿仙奴已經提出新一輪報價，價碼已得到白禮頓原則上認同，但雙方仍然要繼續就細節談判。David Ornstein指出，阿仙奴提出支付4500萬鎊基本轉會費，加上500萬鎊附加條款，但白禮頓就希望確保收取到整整5000萬鎊。雙方近日已進行面對面直接談判，內容圍繞附加條款問題，以及付款結構（相信包括是否分期）等細節，據悉白禮頓目前未有接獲其他球會報價。Sky Sports就指，兩間球會及球員，三方面都同樣對完成交易抱有期望。


因此，從報道睇嚟，阿仙奴傾向願意滿足白禮頓要求，對轉會志在必得。23歲嘅賓韋特先效力修咸頓青年軍及白禮頓青年軍，其後經歷3次外借，直到今季一舉成為白禮頓主力中堅，英超上陣36次，更以出色表現首次入選英格蘭大國腳，於熱身賽上陣，雖一度落選歐國盃26人決選名單，但最終仍因阿諾受傷而獲補選。

另一方面，2018年加盟阿仙奴嘅年輕希臘中堅馬夫路彭路斯（Konstantinos Mavropanos）先後被外借紐倫堡及史特加，普遍被認為並不在計劃當中，但史特加對佢相當滿意，David Ornstein指阿仙奴將佢續租到史特加，而如果史特加來季護級成功的話必須以300萬鎊買斷馬夫路彭路斯，失敗的話買斷條款就成為選項，埋單計數，租借費、買斷費加上未來轉售分成，共500萬鎊。