英超丨賽前文章+心水 : 雙紅會誰能及時回勇?

英超第三輪尾場壓軸大戰,曼聯將於奧脫福球場迎戰利物浦。兩隊開季戰積同樣未如理想,利記兩連和,曼聯兩連敗。今場邊隊能及時回勇,奪得寶貴三分?

未如理想
利記未有最佳狀態,亦受傷兵潮困擾,情況同前季類似。不過,利記控制節奏、保持控球同進攻組織方面都比當時進步,所以表現未至當年般崩潰。利記頭兩場製造到唔少機會,open play情況下有3.12xG,係英超20隊之中最高,不過死球xG只有0.18,係全英超最低。利記面對富咸時狀態不足,面對水晶宮時球隊發揮有改善,可惜紐尼斯兩次錯失良機,之後更沉唔住氣頭頂對方中堅安達臣領紅,球隊最終只能靠迪亞斯嘅世界波迫和對手。

紐尼斯停賽之下,利記正前鋒位置只剩剛剛傷癒嘅費明奴。好在兩位前線拍檔沙拿同迪亞斯狀態不俗。至於其他位置亦有上陣人選,但後備陣容就相對薄弱,今場難以發揮五個換人名額嘅效用。

必有考驗
坦克帶領曼聯重建嘅路上,必會遇到考驗,尤其初期有唔少問題尚未解決。頭兩場面對白禮頓同賓福特,曼聯嘅控球踢法尚未熟練。中場方面,記者羅美路報道卡斯米路即將加盟曼聯,同時指出卡斯米路唔會喺雙紅會上陣。曼聯此刻仍未有組合同時有足夠嘅用球同對抗能力。球隊受壓下容易失誤,若然繼續嘗試推高防線、以控球踢法面對擅長壓迫嘅利記,恐怕會匈多吉少。

曼聯能否喺今場雙紅會取得分數,小弟個人認為視乎坦克及其團隊會否轉陣,以相對保守嘅取態應戰。不過,坦克喺賽前記者會提到,會繼續依照其哲學同計劃。睇嚟曼聯轉陣機會唔大,不過點都應該會喺前兩場嘅基礎上作出調整。作為球迷,一於睇吓坦克麾下嘅曼聯,以及高普帶領嘅利記,邊隊能及時回勇,奪得寶貴嘅三分。

賽前心水
如果要估比數,小弟同數據網站WhoScored一樣睇好利記贏3-0。

歡迎支持本文合作夥伴 @unitedfans_hk !!
loading

如果喜歡我們的文章,請即分享到︰

標籤: 英超  曼聯  利物浦  坦克  高普  

留言


請按此登錄後留言。未成為會員? 立即註冊
    快捷鍵:←
    快捷鍵:→