歐聯丨賽後短文 : 國米拼搏至最後雖敗猶榮 利物浦狀態同運氣都一般 (利物浦 0-1 國際米蘭 總比數 : 2-1) 精選

歐聯十六強次回合，利物浦主場以0-1不敵國際米蘭，利記兩回合計以2-1晉級八強。
雙方陣容:

首回合落後兩球嘅國米今場比較主動。主帥恩沙基安排山齊士代替迪斯高成為正選，搭擋馬天尼斯組成雙箭頭。山齊士今場非常活躍，其於反擊／快攻中嘅串連為球隊帶來唔少組織變化同衝擊力。不過，欠缺迪斯高之下，兩邊翼衛佩利錫同鄧費斯嘅傳中，所帶來嘅威脅比首回合小。下半場嘅拉鋸中，國米前場壓迫見效，令馬迪普傳球失誤，山齊士得到皮球後助攻馬天尼斯喺禁區頂轟入世界波。可惜嘅係，國米入球追近後不久，山齊士因踩中法賓奴犯規而被罰第二面黃牌被罰出場，球隊踢少一人下冇力回天。
國際米蘭眾將整場拼搏至最後一秒，哪怕踢少一人，出局雖敗猶榮。

利記今場比賽比首合更傾向保持控球，當尋找到時機，或者面對對方嘅壓迫，會以高波長傳越過國米壓迫或嘗試打其後防嘅身後。利記今場亦有些許快攻/反擊攻勢，但傷愈復出嘅祖達狀態一般，而沙拿同文尼亦有疲態，所以效果一般。

上半場中後段，隨國米減少壓迫，利記得以圍攻對方，從而製造連串嘅死球機會，其中馬迪普頭槌中楣彈出。下半場兩隊拉鋸對攻之中，利記一次快攻，堤亞高挑傳輾轉製造沙拿中柱嘅射門，加上沙拿尾段再次射門中柱，總共三次射中龍門框，相當欠運。下半場早段，利記更多將隊形壓前，球隊右路嘅配合雖未能滲入國米三中堅嘅防線，但得以為阿諾拉開傳中嘅空間，唯進攻效果受前線體能狀態所限。
防守方面，面對國米嘅攻勢，利記後防足夠專注，大致能夠應付其衝擊，唯馬迪普一次傳球失誤輾轉造成失球。

利物浦單場落敗，係運氣同體能狀態因素加上少許大意嘅結果。