球會領導層的難題 - 領隊篇 (中)

唔係足球咁簡單 於 19/01/2016 發表 收藏文章
上集回顧 : 球會領導層的難題 - 領隊篇 (上)

作為一個領隊淨係面對球員之間既關係就已經好頭痕喇,但除左球員之外,其實領隊仲有好多壓力來源要面對架!事不宜遲,我地即刻黎睇下。

三、教練事務

要帶領球隊取得佳績,一個好既教練團隊係好重要既,因為教練除左訓練球員既技術之外,更加要就住領隊既要求為球隊進行唔同既戰術演練同埋專項培訓。訓練當中除左講究訓練團隊既配合之外,領隊既表達能力都係極之重要既。就算一個領隊腦海入面充滿無限可能,如果佢唔能夠將自己腦海中既畫面帶比教練團隊同球員,咁球隊都唔會有機會可以打到領隊心中既果套戰術同配合。


好多時賽後球迷會鬧領隊戰術失當或者調配失宜等等,其實每個領隊做既每個安排都會有佢自己想要達到既效果,不過效果能唔能夠展現到又係另一回事喇。影響球員發揮既可能性有好多種,可能係領隊賽前無比足夠指示、換人既時候教練冇同球員有足夠溝通、甚至係教練都唔知領隊想點既時候,往往就會令到透過換人換取勝利呢個如意算盤打唔響喇。
然而作為一個領隊更加要同教練有良好既關係,如果唔係教練唔係全心全意幫助一個領隊既,到時球隊成績不佳受苦既亦都係領隊,因為媒體既聚焦點永遠都係領隊身上家麻!

四、面向媒體

係呢個資訊發達既年代,遠至香港既球迷都可以即刻接收到半個地球以外既球會新聞。而幾乎賽後球會都會安排記者會比領隊面向媒體解釋球場上所發生既一切既時候,領隊盲必須要極為慎言喇。當一個領隊面對記者講左啲唔應該講既說話既時候,例如係佢對某個球員好有興趣,咁陣中特定既球員可能就會因為以為領隊唔中意佢而感到不安,從而影響佢係訓練同比賽上既表現。


又例如一個領隊係記者會出言不遜惹怒球迷既,影響都可以係好嚴重架。現今球壇其中主要收入係黎至贊助商,但贊助商都係見到有咁多球迷支持一隊球隊,有商機先會贊助你家麻,所以到最後重點都係落係球迷身上。依加大球會既球迷遍佈世界各地,佢地既影響力真係不容忽視。就好似係有七千一百萬紅魔球迷既美國(來源),曼聯去一次兩個星期既美國之旅就賺左八百萬鎊喇(來源)。面對咁龐大既經濟收益,作為一個領隊如果得失左球迷,相信班主都唔會再想見到呢個倒米大王喇。


好喇今集又同大家講住咁多先,我地下集再見!
如需轉載,請列明出處。

如果中意我地既文章,歡迎你地比個Like 我地呀
本文亦刊於 這裡

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→