曼城三比一逆轉愛華頓取勝 戴治拖肥限米煮限飯其實唔差 精選

曼城三比一逆轉愛華頓取勝 戴治拖肥限米煮限飯其實唔差

英超聖誕快車賽事，愛華頓主場對戰曼城，愛華頓方面上一場雖然落敗予熱刺，但兩球失球後其實冇輸形勢，今日4-5-1陣式中場起用安祖高美斯(André Gomes)、占士加拿(James Garner)同奧拿拿(Amadou Onana)，前鋒以比圖(Beto)作正選，卡華利雲先列後備。另一邊嘅曼城拿下世冠盃後有4日休息，今日4–2-3-1陣式雙中場有洛迪傷癒復出，另一中場就用上馬菲斯紐尼斯(Matheus Nunes)。
一開波兩隊格局鮮明，愛華頓主守等待反擊機會，曼城就掌握控球圍攻，最招牌嘅慢速節奏一下變速，令到愛華頓門將碧福特係15分鐘使出兩連撲先能夠保住不失。然而今日曼城球員狀態不佳，當時上半場仲可以打到3-2-4-1陣式，但科頓出現嘅位置難以比波，紐尼斯經常企上去又無回後幫波，就算係中路攞到波轉身，不論護球或者進攻造詣都未夠好，結果令曼城上半場只係空有控球權、威脅不大。

更甚嘅係30分鐘曼城後防傳送連環犯錯，洛迪係自家禁區誤傳，比到麥尼爾(Dwight McNeil)落底傳中，由積夏里遜(Jack Harrison)撞射入網，愛華頓領先1比0。入球後嘅愛華頓不斷憑住死球做出攻勢，積夏里遜入球後信心大增對住尼敦艾基盤扭都過到，因此上半場愛華頓係中路佈防同防守反擊係打出部署。
換邊後兩隊攻防格局依舊，而曼城球員有搵返信心同作出調整，特別係紐尼斯唔再停係前場而係拉去右邊做短傳同埋人數壓制，洛迪嘅表現亦較為集中。去到53分鐘科頓右路禁區外偷到一絲空間，左腳射近柱入網追平1比1。

其後62分鐘曼城角球攻勢連環施射，其中尼敦艾基轉身起腳，愛華頓中場奧拿拿手臂擋出，結果被判十二碼，艾華利斯主射入網，曼城成功喺下半場反超二比一。

落後嘅愛華頓抽起一位中場打三中堅，再換入卡華利雲轉陣5-4-1，而確實係打出效果，75分鐘卡華利雲禁區內，楔到前柱身位起腳只係僅僅柱邊出界。可惜86分鐘愛華頓自爆，碧福特底線前大腳解圍被艾華利斯閂到，貝拿度施華攞到笠射空門，曼城以入球壓制阿華頓嘅氣勢，最終以三比一作客反勝愛華頓。
愛華頓雖然全場只有26%控球率，但氣勢上完全唔輸曼城，更一度有機會追平2比2，只係球員質素所限令到反擊無疾而終。曼城方面半場調整係逆轉嘅關鍵之一，只不過艾華利斯擔任正前鋒一職，依舊未有做到夏蘭特一半水準，同時間後場史東斯又傷出，面對如今陣容深度嘅問題，曼城係快車賽期都有隱憂。

如果睇到呢度，不妨follow我地嘅instagram睇到更多唔同嘅足球資訊！
IG : Footballarena_hk
Facebook: 足球港場