世界波絕地反擊!巴神挑釁對手主帥原來8年前有過節?

睇足365 於 22/09/2021 發表 收藏文章
如果你曾經話過巴神冇腦,你要小心啲,原來巴神份人好小氣,佢有密切留意邊個批評佢,搵一日向你反擊!


唔講你未必知,「巴神」巴洛迪利其實仲踢緊波,佢今季效力土耳其球隊阿達納迪米爾 (Adana Demirspor) ,開季6場已交出2入球2助攻,真係正宗巴神表現:即係如果正正常常踢波,其實好有級數。

最近一場土超比賽之中, 巴神嘅球隊遇上土超傳統勁旅比錫達斯。順帶一提,比錫達斯陣中有巴舒亞伊擔任正箭頭,而巴洛迪利喺阿達納迪米爾今仗先列後備。阿達納迪米爾踢到52分鐘,已經輸到0:3,睇嚟已經冇得救,不過阿達納迪米爾翼鋒華加斯喺60分鐘追返一球,重燃希望。球隊馬上於67分鐘換入巴洛迪利,巴神去到79分鐘於禁區外突施冷箭,睇唔清楚係唔係有少少改變方向,總之個波就一個曲墜飛咗入網!巴神自己就喺IG post咗入波條片,配以3個emoji。

loading


巴神入完個波其實冇乜點慶祝,但佢走咗埋去場邊,雙手指住自己腦袋,再指一指對手主帥。原來雙方早有過節,事件要講返8年前!

話說2013年,巴神仲效力緊曼城,當年曼城去美國進行熱身賽,對手係洛杉機銀河,而現時比錫達斯主帥耶辛(Sergen Yalcin),當時喺電視台做嘉賓評述員。喺嗰場波入面,巴神突然上身,佢單刀嘅時候拖到慢晒,之後嚟個360度轉身後腳磋波,點知個波就出咗底線,睇到佢拍檔迪斯高勁無奈,文仙尼當然嬲到跳舞,即刻將佢換走(只係上半場30分鐘),兩個仲喺換人之後鬧咗幾句。

loading


講波嘅耶辛就話:「佢真係冇腦㗎喎,如果我係文仙尼,我一定會炒咗佢。」(”He has no brain, if I were in Mancini's shoes I would fire him!”)

loading
loading


巴神就一路記住,今場仇人見面,一入波就衝去邊線,指住個腦,亦因為球證認為呢個係挑釁動作,所以俾咗張黃牌佢。不過入波都未夠,最威嘅巴神喺補時第7分鐘助攻隊友入波,令球隊絕地追和3:3,話曬比錫達斯都係榜首球隊,咁樣嘔返兩分出嚟,巴神應該都覺得出一口氣。

賽後,阿達納迪米爾球隊主席就回應,認為巴神嘅回應同對手教練當初嘅言論都係唔恰當。耶辛喺賽後訪問中似乎唔係好記得8年前嘅事:「我都係第一次見一個球員對住一個領隊咁樣做。我唔係好明點解佢咁做,可能因為佢舊年未能加盟比錫達斯。呢件事反映佢嘅個性。」

留言


請按此登錄後留言。未成為會員? 立即註冊
    快捷鍵:←
    快捷鍵:→