沙維大讚史達寧可成世界最佳:「尼馬、麥巴比、沙拿都有機會,但我最睇好史達寧」

睇足365 於 18/09/2019 發表 收藏文章
現時球壇有兩位球王級人馬——C朗拿度、美斯,尼馬曾經被睇好成為下一位球王,佢雖然已經係世界級球星,但佢近年冇太多令人驚艷嘅演出,反而負面新聞纏身,球場上又多次受傷、停賽,加上PSG喺歐聯戰績欠佳,普遍球迷心目中嘅準球王級人馬可能已經冇佢份,咁到底未來球壇嘅霸主誰屬?


巴塞隆拿名宿沙維曾經成功預測2019亞洲盃形勢及批中卡塔爾奪標,唔知佢睇球員係唔係都咁準?沙維最近接受傳媒專訪,談到自己心見中嘅未來球王之選,就表示十分睇好史達寧喺哥迪奧拿調教下可以超越尼馬等球星:

「美斯同C朗已經橫掃球壇各大『世界最佳』獎項多年,令人幾乎忘記上一個年代嘅光景。美斯對我嚟講係史上最佳,雖然美斯同C朗仍然當打,但我相信好快會有異軍突起。

當你睇住而家班年輕球員,去諗邊一個有機會成為將來世界最佳球員時,你會諗到尼馬、麥巴比、沙Z,仲有史達寧,我認為史達寧將會贏出呢場爭奪戰。」

24歲嘅史達寧近年喺哥迪奧拿麾下取得極大進步,雖然把握力仍然有待改善,但上季已經為曼城於各項賽事射入25球,今季亦已射入6球,佢靈活嘅走位入楔已經成為曼城嘅重要武器。Sky Sports主持人、利物浦名宿加歷查亦曾表示認為史達寧比尼馬強。


比起佢嘅巴塞「師弟」尼馬,沙維認為史達寧喺哥帥仍有好大進步空間:

「佢一直都係一個好球員,一個有威脅嘅球員,但喺哥迪奧拿手下,佢已經成為世上其中一個頂級球員。

我清楚哥帥嘅工作方式,相信佢由接掌曼城開始已經同史達寧密切溝通,不斷指出佢需要改進嘅地方。我哋而家已經見到成果,史達寧仲好年輕,可以成為世界最佳。」



Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→