<E波Live> - 荷媒選出今季十大最令人失望球星 (下)

E 波 Live 於 19/05/2016 發表 收藏文章
如果喜歡我的文章,歡迎各位讚好E波Live專頁,每星期四晚同你節目論盡足球事
https://www.facebook.com/eballlive
個人專頁又得
https://www.facebook.com/talkativegm


歐洲五大聯賽已宣佈落幕,各大球員獎項亦名花有主。不過唔係每個獎項球員都想上榜,近日荷蘭媒體《soccernews》就評選出2015/16賽季十大最令人失望球星,上集同大家睇過第十至第六位,係咪發覺有D應該係度既人未出現呢?


5馬里奧.葛斯 (Mario Götze) - (拜仁)
如果大家頭先發現原來祖維迪都係26歲,咁你地又醒唔醒起呢位被視為多蒙特叛徒,休季期間扯爆泳褲,世界盃決賽射入致勝入球既馬里奧.葛斯呢一刻其實只係得23歲? 今年已經係葛斯係拜仁既第三年,頭兩年表現都尚算過得去,但今季10月既一次重傷,就令到佢要讓出佢既正選位置,即使好番之後係陣中都變得可有可冇,今季佢聯賽最後只錄得11次正選,3次後備既紀錄,3入球應該係佢六年既新低,剩番一年合約佢今年夏天好有可能會離隊,唔知會唔會鯉魚翻身呢?

4迪比 (Memphis Depay) - (曼聯)
見到迪比排第四位,我相信大家唯一既疑問係,點解佢只係排第四位咁低? 係咪荷蘭人偏幫荷蘭人? 的確,狹2014年世界盃最佳年輕球員三甲,2014/15年度荷甲神射手之名而黎既迪比,全季加埋只係聯賽入得兩球波,同一樣以高價轉會過黎,屢屢救曼聯於水深火海之中既馬迪爾既表現形成左一個強烈既對比。睇黎迪比呢2500萬磅轉會費,又會係雲高爾上任而黎,另一筆失敗之作。不過係度同佢講番佢好說話啦,當雲高爾連歐洲助攻王迪馬利亞都可以用到艾殊利楊格都不如,舒拉達連都可以攪到連國家隊都入選唔到,轉換下環境,或者轉換下領隊,迪比可能仲有得救既?

3耶耶托尼 (Yaya Touré) - (曼城)
耶耶托尼既入選,我估計同佢高昂既人工,以及同過往幾年既表現比較有絕大既關係,6個入球5個助攻放係第二個球員身上可能無咩問題,但如果係耶郡托尼的話,大家難免會覺得唔多滿意。耶耶托尼近年既速度好明顯嚴重下滑,而且亦經常漫遊球場懶於回防,曼城唔少既失波都關佢走漏人事。有關問題其實一路都存在,只不過以往耶耶托尼可以用佢既入球能力 (尤其關鍵時刻) 去抵銷佢既缺點,但今季當耶耶連入球能力都降低埋,有關問題自然會被無限放大,尤其季尾有部份大戰,曼城都寧願用上費蘭甸奴同費蘭度呢兩位紀律性比較高既球員,下季仲要由當年賣佢走既哥帥入主曼城,睇黎耶耶真係可以搵到下家。

2夏薩特 (Eden Hazard) - (車路士)
美斯同C朗拿度統治球壇多年難分軒輊,其中一個球迷茶餘飯後經常會討論既話題就係「邊個係世界第三?」,筆者近幾年一直將這一票投比蘇亞雷斯,但如果時間倒流到一年之外,我相信夏薩特會是不少球迷心目中的答案。夏薩特上季帶領車路士重奪聯賽冠軍,自己個人表現亦可圈可點,誰也沒估計過今年車路士以及夏薩特的命運竟是如此 --- 季初早早傳出將帥不和,及後聯賽早早宣佈無力翻天,摩連奴離職,夏薩特這位當日被視為「猶大」的大熱門,表現並沒有因為球隊易帥而有好轉,一直到四月尾,第三十四輪的英超聯賽,這位比利時球星先至攻入今季聯賽第一球。丫,唔通條友仔真係為左歐國杯留力? 佢季尾真係番晒黎喎!

1占士洛迪古斯 (James Rodríguez) - (皇馬)
千呼萬喚始出來既第一位,係屬於呢位八千萬先生既。雖然筆者心中既第一位係屬於夏神,不過今年占士都真係過左佢幾黑暗既一季。由當日世界盃光芒四射既表現,令到一年一星既皇馬重金禮聘將佢簽入,處子球季聯賽入球同助攻都去到13個,外界估計佢既未來應該繼續平步青雲。點知自從施丹上任之後,慢慢就越黎越唔鍾意用佢,係中場既排名長期都係卻奧斯,摩迪甚至伊斯高之後,係歐聯八強同四強四場加埋,占士洛迪古斯只係獲得總共28分鐘既出場時間。所以佢排呢個榜既榜首,某程度上都係同施丹有關既。難怪好多媒體都係佢季後應該會離隊,只不過以佢既身價,除左巴黎聖日耳門再加車路士曼聯同曼城之外,睇怕都無咩邊隊接得起喇!

其他漏網之魚仲包括馬迪,賓迪基,藍斯,韋費特邦尼,尼格度,巴洛迪利,朗尼,丹尼路,艾邦拉賀,雷斯阿祖安奴等等等等

球迷們,你地既選擇又係咩呢?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Kafai Gor
    Kafai Gor 於 19/05/2016 評論 NO. 1

    威污泥呢

  • Shaco Chau
    Shaco Chau 於 19/05/2016 評論 NO. 2

    J洛其實都幾無辜...
    第一應該係迪比同世三之爭架嘛

  • 工藤新一
    工藤新一 於 19/05/2016 評論 NO. 3

    迪馬利亞上季喺曼聯都已經係冇心踢同差,但都有10個助攻,喺英超助攻榜僅次於費比加斯。但迪比真係完全失敗嗰種,成日攞住個波過唔到人,出波底線傳底,同馬斯亞成強烈對比完全正確。

  • Jacob Wong
    Jacob Wong 於 19/05/2016 評論 NO. 4

    James絕對不認同

  • Lee Ming Chai
    Lee Ming Chai 於 19/05/2016 評論 NO. 5

    迪比
    扭波,傳波都有得賴對手,隊友唔同咗
    但是擺定定個波嘅罰球都冇腳好波
    😪😪😪

  • Jenson Chan
    Jenson Chan 於 19/05/2016 評論 NO. 6

    迪比邊到係球星 ?

  • Fa Ng
    Fa Ng 於 19/05/2016 評論 NO. 7

    冇睇占士踢成點,但從評價上點到睇唔出係最差一位

  • Yim Siu
    Yim Siu 於 19/05/2016 評論 NO. 8

    冇朗尼😨

  • Edward Long
    Edward Long 於 19/05/2016 評論 NO. 9

    邦尼冇份係因為根本對佢冇希望...

快捷鍵:←
快捷鍵:→