<E波Live> - 荷媒選出今季十大最令人失望球星 (上)

E 波 Live 於 18/05/2016 發表 收藏文章
如果喜歡我的文章,歡迎各位讚好E波Live專頁,每星期四晚同你節目論盡足球事
https://www.facebook.com/eballlive
個人專頁又得
https://www.facebook.com/talkativegm


歐洲五大聯賽已宣佈落幕,各大球員獎項亦名花有主。不過唔係每個獎項球員都想上榜,近日荷蘭媒體《soccernews》就評選出2015/16賽季十大最令人失望球星,當中有冇邊個最岩你心水呢? E波Live同你由第十位開始逐個數

10祖維迪 (Stevan Jovetić) - (國際米蘭)
呢位黑山前鋒成名已久,其實佢今年只係26歲而已。祖維迪最令人有深刻印象既應該就係當年係費倫天拿,以19歲之齡梅開二度帶領球隊撃敗利物浦,可惜近年因不停既傷患困擾,令佢始終唔能夠達到外界對佢既期望。係曼城渡過左兩個失望既球季之後,祖維迪今年被租借到國際米蘭,26場聯賽,6個入球,呢份成績表依然未能令人信服。順帶一提,國際米蘭下季會係連續第五年無緣歐聯,可惜。

9馬天尼斯 (Jackson Martínez) - (廣州恆大)
今年冬季轉會市場,中超球隊盡顯土豪味道,其中一位標王就係呢位J.馬天尼斯。不過可惜無論係馬體會同恆大,佢都發揮唔到佢當日係葡超連奪三屆神射手既實力。馬天尼斯加盟恆大後聯賽暫時五場入三球,只屬僅僅合格,近期因傷缺陣之下代替佢出場既阿蘭表現好似更好,至於亞冠杯方面,馬天尼斯既表現就更加慘不忍睹,五場小組賽一球都入唔到,間接令到恆大呢支衛冕冠軍小組賽出局。馬體會近年屢出神鋒,唯獨J,馬天尼斯失敗收場,睇黎未必冇原因。

8贊奴沙 (Adnan Januzaj) - (曼聯)
呢份名單上大部份上榜既都係已經成左名既球星,贊奴沙係少數尚待上位既新星,唔通因為有關人士本身都佢期望好大? 又難怪既,贊奴沙18歲就已經係曼聯打正選,係莫耶斯年代少數令球迷欣喜既地方,雖然當年佢都被認為盤扭過多,而且有時略嫌獨食,但對於一個新星黎講,仍然足夠令外界對佢寄以厚望。不過自從雲高爾上任後,佢既惡夢就正式展開,今季被外借多蒙特半季期間出場次數不多,下半季番黎曼聯就更加只係得到三場總共17分鐘既上陣時間,再係甘落去,贊奴沙就真係係甘先。


7禾確特 (Theo Walcott) - (阿仙奴)
17歲就有得隨隊征戰世界盃,禾確特曾盛載住無數甘多英格蘭甚至阿仙奴球迷既希望,之但係今時今日禾仔已經27歲,比人既感覺依然係只靠速度食糊,打前鋒把握力又不足,打翼又缺乏傳中能力,致令球員生涯依然停滯不前。特登揀呢張相,係因為自從呢場波之後,我對佢已經冇咩難忘既印象了。今季聯賽打左28場,當中15場係正選,5入球2助攻,唔怪得兵工廠輸李斯特城10分啦。

6艾達杜蘭 (Arda Turan) - (巴塞隆拿)
明明本身就係馬體會球迷既寵兒,但艾達杜蘭當日寧願坐半季波監都要過檔巴塞隆拿,甘又係既,地上最強既吸引力又真係令球員難以抗拒,球會既知名度同規模唔係馬體會打幾季好波就可以取代到。只不過,有陣時勉強又唔一定有幸福,艾達杜蘭唔知係唔係因為有半季冇打正式賽事,加盟到宜家為止始終令人覺得有少少格格不入。3400萬歐元轉會費,換黎兩個入球三個助攻,場上主要工作都係駁腳居多,點計都唔多合格。


頭五甲,應該有鐵膽喇卦?

留言


請按此登錄後留言。未成為會員? 立即註冊
  • wongkit517 於 18/05/2016 評論 NO. 1

    馬天尼斯只係踢左半季都唔算馬會出產

  • oneweek 於 18/05/2016 評論 NO. 2

    因為佢馬會都令人失望,叫做計足一季架喇哈哈

快捷鍵:←
快捷鍵:→