【英格蘭】麥佳亞、麥迪臣、基亞利殊OUT！三獅26人名單確定 精選

英格蘭早前公佈歐國盃嘅33人初選大軍名單，英國時間6月6號再提早公佈26人嘅正式名單。曼聯中堅麥佳亞、熱刺中場麥迪臣、曼城中場基亞利殊呢三位球星冇得留低，連同居迪斯鍾斯、昆沙、班夫韋治、查褔特呢四位小將，合共7個人被主帥修夫基（Gareth Southgate）cut走。
「對於未能入選歐國盃嘅杯英格蘭陣容，我感到非常失望。儘管我已經盡咗最大努力，但我未能克服小腿嘅傷勢。」今季季初拒絕轉會嘅麥佳亞（Harry Maguire），留喺曼聯打出鹹魚翻身嘅一季，態度、穩定性都有明顯改變。加上修夫基向來喺國際大賽都重用麥佳亞、史東斯做中堅鐵膽，麥佳亞嘅翻生，令人對英格蘭又多咗期待。

不過，如同曼聯一眾後衛一樣，麥佳亞喺季尾都因傷缺陣多時，足總盃決賽都冇參與到，佢復元嘅速度都等唔切英格蘭公佈大軍名單嘅一刻，無法隨隊前往德國。「簡單來講，我真係非常難過。」麥佳亞喺IG抒發感受，睇嚟相當唔開心。
基亞利殊（Jack Grealish）方面，呢位曼城「十號仔」被季初嘅腿傷所累，全季都表現唔出星級表現。縱使基亞利殊本人已經盡力去回復狀態，但彭馬、科頓呢兩位師出曼城嘅明日之星都喺英格蘭陣；中，更有水晶宮嘅艾斯，令作用相近嘅基亞利殊被踢走，連過往喺國際大賽嘅後備角色都冇得做，都係合情合理。

同樣要負責造波，但位置比較靠後嘅占士麥迪臣（James Maddison），同樣冇得留低。今季由降班嘅李斯特城轉會到熱刺，麥迪臣在陣嘅球隊，能夠喺4-2-3-1、4-3-3兩個陣式都能夠來回切換，佢本人都有個生涯新開始，為苦無派牌能手嘅熱刺開拓一條新出路，陣初十連不敗嘅走勢，麥迪臣功不可沒。

不過，麥迪臣嘅落選都唔算令人意外，佢今年年頭克服膝傷後，表現冇季初咁搶鏡，反而水晶宮嘅年輕防中禾頓，同埋曼聯青訓中場文奴更有睇頭，仲未計對右邊中場位置虎視眈眈嘅利物浦右閘阿歷山大阿諾。若果修夫基打4-3-3陣式嘅話，喺比寧咸、懷斯呢兩位鐵膽中場身邊，佢哋喺中場提供嘅保護同活力，比起派牌型嘅麥迪臣，更能夠比人信心。