【破繭而出】一手帶動車仔鋒線 彭馬生涯大事可期｜球員分析 精選

上季以大後備身份取得三冠王，今季轉會後破繭而出，一手帶起呢支沉淪一時嘅球隊搶得歐洲賽席位，一舉奪得車路士隊內最佳球員、英超最佳年青球員等等嘅獎項。英格蘭新星高爾彭馬（Cole Palmer）大爆發，一粒潛力巨星即將面世。

彭馬喺今季嘅轉會死線前由曼城轉會到車路士，錄得22球、11助攻，兼有隊內十二碼劊子手嘅地位，平均90分鐘創造射門機會達5.6次，帶波入三閘線2.3次。以上數據都係隊內有恆常出賽嘅球員裏面最高，證明佢對車路士嘅進攻有幾重要。即使減咗佢9球十二碼，都有雙雙嘅數據。對阿仙奴、曼城呢兩支爭冠勁旅，都能夠頂住壓力，射入改變賽果嘅入波。以一個第一季做核心嘅年青球員嚟講，已經算誇張。

今季車路士前線嘅佈陣嘅變化，視乎嗰陣係踢緊雙中場定係三中場。彭馬嘅位置介乎於翼鋒同攻中之間，主帥普捷天奴（Mauricio Pochettino）比佢好大嘅自由度發揮技術，加上速度、力量合而為一嘅球風，成為車路士今季最強尖刀，令對手難以招架。
當然，要得到咁大自由度，球員本身都要有相當高嘅足球智商，彭馬就做到呢一點。佢知道自己喺唔同嘅陣型之下點樣去補位，點樣去配合，咩時間點要由右翼切到中路。而喺列斯占士、古斯圖呢兩位右路飛閘一齊因傷缺陣嘅情況下，點樣喺缺乏支援嘅情況下，撐起球隊右路嘅進攻。
補充個紀錄，對上兩個喺單季參與30個入波嘅U22球員，已經係夏蘭特、C朗拿度呢兩位同頂級巨星但唔同嘅係，C朗嗰年有費格遜傍住成長，夏蘭特就有哥迪奧拿指導，兩位名帥都能夠喺球員成長嘅黃金時期長期執教球員，比佢哋喺一致嘅環境下，踏上成為超級球星嘅道路。
而家嘅車路士教練朝不保夕，今季一手發掘彭馬潛能嘅普帥，教完一季就被炒魷魚，彭馬嘅前景喺新主帥馬利斯卡手下，會唔會有上述兩位球星咁燦爛，呢點值得關注。

無論之後如何，2023/24賽季嘅彭馬已經為自己嘅職業生涯打咗個靚底。未來車路士喺馬利斯卡喺手下，要做嘅係點樣利用彭馬呢隻「車」，解放其他仲喺沉淪之中嘅進攻球員，例如梅迪歷、積遜等人個個都係高期望低回報，佢哋喺彭馬輔助下能夠兌現潛力的話，車路士先有重返榮耀嘅希望。