心態+體格+射術+意識，形成夏蘭特呢個怪物 精選

夏蘭特加盟英超，喺曼城11場入17球，唔駛半季已經搶盡全球球壇焦點，進而衍生出「夏蘭特咁勁，使鬼分析咩！？」、「布歐你估流㗎？」之類嘅評論。

夏蘭特嘅射術同體格，係佢咁具威脅嘅主因。但我認為哥迪奧拿更加睇重嘅，係佢對走位嘅時間判斷同意識準備，先至可以融入到曼城呢隊要透過主宰空間嚟完成攻勢嘅球隊。

具備體能、身型、敏銳度，先天條件已經儼如怪物一般嘅存在。身型令佢可攬大步過人，加上爆發力，形成步大力雄嘅無球走動。但有體型優勢係唔夠嘅，仲要有意識先可以轉化成真正嘅入球。
佢擅長喺防線前遊弋，唔容易構成越位。如果對手用高位防線嚟製造越位陷阱嚟對付佢，佢會用好聰明嘅走位嚟避免，佢對後防線移動步伐嘅探知，早就超越同齡嘅球員，喺自己曝露於越位位置前就提早避免。有時會刻意調整步姿，等對手以為自己無意攞波之際突然衝前，喺防線之中形成混亂，趁對手後防調整唔切之際形成攞波嘅空位，進而形成入波嘅機會。

以上幾種得天獨厚嘅天賦，加上呢兩年半喺德甲嘅磨練，煉成呢一季喺英超入極都有嘅夏蘭特。加上曼城中場個個肯跑肯博之餘，傳球毒辣又一劍封喉，配合夏蘭特呢個走位聰明嘅天生射手，就算哥迪奧拿要放棄一個前場傳控點都在所不惜。
心態成熟又願意配合隊友，骨格精奇場上見人爆人，射術精湛門前入球如麻。咁嘅球員，試問邊度搵？

以往C朗喺皇馬，聯賽場均入球超過1.0嘅數據，已經值得載入足球史冊之中。而夏蘭特一個22歲嘅年青球員，已經將「聯賽場均入球超過1.0」呢個數字，喺奧超、德甲甚至英超體現出嚟。

而上腳方面，已經由當年效力多蒙特第一季，平均約2次盤球成功1次，降到而家平均約1次盤球成功半次都冇，戰術上唔需要佢持球面對後衛，而係要佢專心做衝鋒嘅角色，發揮自己最強嘅功能：入波。

而家呢隊曼城，有正值風華之齡嘅迪布尼、貝拿度施華、基利殊等等創造型球員，有組織力愈嚟愈好嘅簡些路。佢哋嘅背後，有一套已經成熟，甚至可以為夏蘭特而及時調整嘅傳控體系，好難想像未來幾年有夏蘭特擔任箭頭嘅曼城，恐怖嘅程度可以去到咩位。