11年掙扎之終章 修咸頓墊底降班|英超球季回顧

思歪Stadium 於 31/05/2023 發表 收藏文章
修咸頓資源緊絀,球隊不時會遇上風波,但多季以嚟,最後都能夠達成「生存」呢個卑微嘅目標。青訓營同球探部門嘅出色表現,更令呢支球隊長年都能夠出產同訓練出有潛質嘅新星,變賣後成為球隊繼續生存嘅資產。

盃賽淘汰過曼城,聯賽打敗過車仔,以及對榜首阿仙奴嘅兩回合和波,修咸頓呢一季都唔係完全冇開心嘅時光。不過,持續一整年嘅動盪不安,令呢一支十分頑強嘅南部球隊,最終都係逃不過降班嘅命運。修咸頓喺2022/23球季,38戰25負只得25分喺英超墊底,距離護級標準有11分之差,宣布結束連續11年嘅頂級聯賽之旅。
季初辭退哈幸赫圖(Ralph Hasenhuttl)嘅決定,外間以為修頓有意早早大破大立,畢竟哈幸赫圖踢法有異於一般中下遊球隊,能夠踢出活力同壓迫力,願意比年輕球員上位機會,在位幾季之間深受球迷歡迎,就算有被曼聯、李斯特城先後大炒9-0嘅血腥經歷,仍然能夠短時間內作出調整,搵出球隊問題,但今季季初已經要開護級mode,令呢位紅牛系出身嘅教頭難逃下台宿命。

接替佢嘅尼敦鐘斯,喺新年前後10戰9負嘅走勢,奠定咗修咸頓穩坐榜尾嘅根基。當中最令人沮喪嘅比賽,莫過於呢段走勢當中最後一場對狼隊嘅敗仗,上半場中段領先,而且大半場比賽踢多一個人嘅情況下,下半場比狼隊連追兩球反超前,反映出修咸頓一直以嚟嘅韌性,如今已經盪然無存。負予狼隊後,球隊迎嚟季內第二度換帥,少帥西耶斯已經無力回天,只係管理層錯誤任命尼敦鐘斯嘅遮羞布。

戰至35場比賽,修咸頓嘅總射門次數之中,有約4成係嚟自禁區外。呢個數字唔係話佢哋嘅遠射幾有power,而係調轉頭反映佢哋冇能力製造有質素嘅攻勢,先至需要放更多冷箭去撞手神。到第36場比賽,喺英國首相辛偉誠親眼見證之下,修咸頓喺主場0-2不敵富咸,完結長達11年嘅英超之旅,下一季由英冠重新開始。
球隊來季英冠見,隊內有咁上吓實力嘅球員,無可避免會出走他投。翼鋒艾利安奴斯季尾完約,唔怕冇英超中下遊球隊報價。前鋒阿當斯、後衛沙利素僅剩1年合約,市場上絕對有吸引力,加上隊長禾特包斯等人,下季應該可以繼續喺英超見到佢哋。但修咸頓橫跨一個時代嘅努力,就喺2023年嘅夏天劃上句號。

留言


請按此登錄後留言。未成為會員? 立即註冊
    快捷鍵:←
    快捷鍵:→