維拉果斷的換帥，換來最好的結果｜英超球季回顧

由謝拉特到艾瑪利，阿士東維拉今季經歷過一支中遊球隊嘅大起大落。季初嘅護級mode，令主帥謝拉特（Steven Gerrard）下課，老四首戰英超唔夠一年就玩完，球隊由老謀深算嘅艾瑪利（Unai Emery）接手，走到最後迎嚟一個歐洲賽席位。今季阿士東維拉嘅重生之旅，足以載入英超史冊。
臨休季前15場波，維拉贏足10場，令維拉最終以1分之差壓過熱刺取得歐協席位（未計殺入歐協決賽嘅韋斯咸有機會出戰歐霸），更達成13年嚟最好嘅英超聯賽成績。

而維拉呢一路走來，當然唔止艾瑪利一個人嘅功勞。由前前主帥甸史密夫奠定嘅陣容根基，謝拉特後來再加以調整。明斯、干沙、積及藍斯、利安拜利等人，呢幾季喺維拉穩步成長，今季已經成為球隊鐵打不動嘅主力，係呢趟歐洲賽之旅嘅核心成員。防中大將杜格拉斯路爾斯（Douglas Luiz），更成為隊內球迷票選同球隊票選嘅「雙料足球先生」，足證季初球隊拒絕阿仙奴報價嘅正確之處。
但謝拉特季初對全新球季手足無措，促成管理層要果斷換帥．由謝拉特場均0.81分排17位，到艾瑪利1.96分排第7位，英超諸軍咁多炒教練嘅case之中，維拉可以話係換帥嘅最佳例子。而路爾斯聯手新援卡馬拉（Boubacar Kamara），聯賽正選聯手16場，艾瑪利發掘出新雙防中嘅用法，配合麥堅、藍斯喺兩線之間嘅輔位作動，形成維拉以中路為主嘅攻守架構。

今季如果屈堅斯忘記帶上射門鞋，球隊或將深陷麻煩。維拉以£15M的價格出售丹尼英斯，表示球隊只剩屈堅斯一個可靠的中鋒。幸而屈堅斯喺下半季賽事19場入12球，用入球效率嚟回饋艾瑪利對嘅信任。但喺佢之後，球隊似乎再冇用得著嘅射手。

身處中部大城市伯明翰，擁有可以容納42000人嘅大球場，阿士東維拉喺英超中遊裏面，一直係規模比較大嘅球隊。今季終於取得歐洲賽資格，回應咗球迷由升班以嚟嘅期待。班主已經準備好有進一步嘅補強，應付來季四線作戰。